ފީފާ ވޯލްޑްކަޕުގެ ކުއާޓާފައިނަލުގެ ފުރަތަމަ މެޗުގައި ޕެނަލްޓީން ބްރެޒިލްގެ މައްޗަށް ކްރޮއޭޝިއާ ކުރި ހޯދި މެޗުގައި ލިބުނު ނާކާމިޔާބީގެ ސަބަބުން، "ނަފްސާނީގޮތުން ހަލާކުވެއްޖެ" ކަމަށް ބުނެ ބްރެޒިލްގެ ހުނަރުވެރި ކުޅުންތެރިޔާ ނޭމާ ޖޫނިއަރ އޭނާގެ އިހްސާސްތައް ބަންޑުން ކޮށްލައިފިއެވެ. 

ކުއާޓާ ފައިނަލްގެ އެ މެޗު، ކްރޮއޭޝިއާ ކާމިޔާބުކުރީ މެޗުގެ ފުރިހަމަ ވަގުތު ހަމަވިއިރު 1-1 އިން ދެ ޓީމު އޮތުމާއެކު އިތުރު ވަގުތުގެ ދެ ހާފުގައި ވެސް ނަތީޖާ ނުނެރެވުމުން ޕެނަލްޓީގައި 4-2 ގެ ނަތީޖާއަކުން ކުރިހޯދައިގެންނެވެ.

ޕެނަލްޓީ ޝޫޓްއައުޓްގައި ކްރޮއޭޝިއާ އިން ޖެހި ހުރިހާ ޕެނަލްޓީއެއް ވަނީ ކާމިޔާބުކޮށްފައެވެ. އެހެންނަމަވެސް ބްރެޒިލުން ޖެހި ދެ ޕެނަލްޓީ ވަނީ ނާކާމިޔާބުވެފަ އެވެ.

އެ މެޗުގައި މޮޅު ކުޅުމެއް ބްރެޒިލްގެ ފަރާތުން ފެނިގެން ގޮސްފައި ވީނަމަވެސް ލަނޑު ޖަހައިގެން ލީޑު ނެގިފައި ނުވާއިރު, މިއީ ވޯލްޑްކަޕުގެ ކުއާޓާފައިނަލާ ހިސާބުން ބްރެޒިލް މުބާރާތުން ޖެހިޖެހިގެން އަލްވަދާއު ކިޔަން ޖެހުނު ދެވަނަ ފަހަރެވެ. 

މެޗުން ބަލިވުމާއި ގުޅިގެން ލިބުނު ހިތާމައާއި ހިތްދަތިކަން، ފާޅުކޮށް، ނޭމާ އިންސްޓަގްރާމް ގައި ކުރި ޕޯސްޓެއްގައި އޭނާ ވަނީ، "މިހުރީ ނަފްސާނީ ގޮތުން ހަލާކުވެފައި" ކަމަށް ބުނެފައެވެ. 

"މިއީ މިހާތަނަށްވެސް އަހަރެންނަށް އެންމެ ހިތްދަތިވި ނާކާމިޔާބީ. މި ނާކާމިޔާބީގެ ސަބަބުން މެޗު ނިމި ދިހަ ވަރަކަށް މިނެޓް ވަންދެން އަހަރެން ހުރީ ގަނޑުވެފައި. އޭގެ ފަހުން ބަޑި ފަޅައިގެންގޮސް އަހަރެންނަށް ރޮވެން ފެށީ. ފެށި ގޮތަށް ރުއިން ހުއްޓާވެސް ނުލެވުނު. ކަންދިމާކޮށްފައިވާ ގޮތުން، މި ހިތްދަތިކަން ވަރަށް ގިނަ ދުވަސްވަންދެން ދެމި ހުންނާނެ." ނޭމާ އޭނާގެ އިންސްޓަގްރާމްގައި ކޮށްފައިވާ ޕޯސްޓެއްގައި ބުނެފައިވެއެވެ. 

ނޭމާގެ މި ޕޯސްޓަށް 19 މިލިއަނަށް ވުރެ ގިނަ ލައިކްސް ލިބިފައި ވާއިރު، ވަރަށް ގިނަ ބަޔަކު އަންނަނީ އޭނާއަށް ހިތްވަރު ދެމުންނެވެ. އެގޮތުން ބްރެޒިލްގެ ފުޓުބޯޅަ ލެޖެންޑް ޕެލޭ ވެސް ވަނީ މީހުންނަށް ނަމުނާ އަކަށް ވުމުގައި ދެމި ހުރުމަށް އެދި ނޭމާގެ އެ ޕޯސްޓަށް ކޮމެންޓު ކޮށްފައެވެ. 

ނޭމާގެ ވާހަކަތަކުން މިއީ އޭނާގެ އެންމެ ފަހު ވޯލްޑްކަޕު ކަން މީގެ ކުރިން އިޝާރާތް ކޮށްފައިވާއިރު، މިއީ އޭނާއާއި އޭނާގެ ސަޕޯޓަރުންނަށް ވަރަށް ހިތްދަތި ނިމުމެއް ކަމަށް ގިނަ ބަޔަކު ދެކެއެވެ.