ޤަތަރުގައި މިހާރު ކުރިއަށްދާ ވޯލްޑްކަޕް ގެ ކުއާޓާ ފައިނަލުގައި، ރޭ 1-0 އިން ގަދަފަދަ ޕޯޗުގަލް ޓީމުބަލިކޮށް މޮރޮކޯ އިން ހޯދި ކާމިޔާބީ އަށްފަހު މިފަހަރުވެސް އެންމެންގެ ސަމާލުކަން އެންމެ ބޮޑަށް ލިބިގެން ދިޔައީ މޮރޮކޯ ޓީމުގެ ކުޅުންތެރިން އެ ކާމިޔާބީ ފާހަގަކުރި ގޮތެވެ. 

ވޯލްޑް ކަޕްގެ ދިގު ތާރީހުގައި ވޯލްޑް ކަޕްގެ ސެމީ ފައިނަލުން ފުރުސަތު ހޯދި އެފްރިކާގެ ފުރަތަމަ ޓީމަށް މޮރޮކޯ ވެފައިވާއިރު، މޮރޮކޯ ގެ މި ކާމިޔާބީ އަކީ އެފްރިކާގެ އިތުރުން މުސްލިމުންނަށްވެސް ލިބިގެންދިޔަ ބޮޑު ކާމިޔާބީއެއް ކަމަށް ގިނަ ބަޔަކު ދެކެއެވެ. އެހެނީ މޮރޮކޯ އަކީ 99 އިންސައްތަ މުސްލިމު ގައުމެކެވެ. 

މީގެ ކުރިން ފެނިގެން ދިޔަ މެޗުތަކުގައިވެސް، މޮރޮކޯ ޓީމުން ކާމިޔާބީ ފާހަގަކުރުމުގެ ގޮތުން އެންމެ ފުރަތަަމަ ޖަހަނީ ޝުކުރުގެ ސަޖިދައެކެވެ. އެއަށްފަހު، އެ ކާމިޔާބީ ފާހަގަކުރުމުގެ ގޮތުން ފަލަސްޠީނުގެ ދިދައާއިއެކު ޓީމުގެ ކުޅުންތެރިން ފޮޓޯ ނަގާއިރު، ރޭގެ މެޗުގައިވެސް ފެނިގެން ދިޔައީ އެފަދަ އުފާވެރި މަންޒަރުތަކެކެވެ. 

އަދި އޭގެ އިތުރުން، މެޗަށްފަހު، މޮރޮކޯ ޓީމުގެ ކުޅުންތެރިންގެ މަންމައިންނާއި އެމީހުންގެ ދަރިންނާއި އާއިލާގެ މީހުން ދަނޑަށް ގެނެސްފައިވާއިރު، އެ އާއިލާ ތަކުގެ މެދުގައި އޮތް ލޯބި ވަރަށް ރަނގަޅަށް ދަނޑުމަތިން ވެސް ވަނީ ފެނިގެން ގޮސްފައެވެ. 

މޮރޮކޯ ޓީމުގެ ކުޅުންތެރިންނާއި އެ ކުޅުންތެރިން ގެ މަންމައިން އަދި ދަރިން އެކީގައި ފެނިގެންދިޔަ މިއުފާވެރި މަންޒަރާއި ގުޅިގެން، ވަރަށް ގިނަ މީހުންގެ އިތުރުން ފީފާގެ ސަމާލުކަންވެސް ވަނީ ލިބިފައެވެ. 

އަދި މޮރޮކޯ ޓީމުގެ ކާމިޔާބީގެ އަސްލަކީވެސް ޢާއިލާއިން ލިބޭ ހިތްވަރު ކަމަށް ގިނަ ބަޔަކު ބުނެއެވެ.