ވޯލްޑްކަޕުން ލިބުނު ނާކާމިޔާބީއާއި އެކު ބްރެޒިލްގެ ހުނަރުވެރި ކުޅުންތެރިޔާ ނޭމާ ޖޫނިއަރ ރާއްޖެ އައިސްފައިވާ ކަމަށް ބުނެ ބައެއް ނޫސްތަކުން ފަތުރާފައިވާ ޚަބަރު ދޮގުކޮށް އޭނާ ރާއްޖެ ނާންނަކަމަށް ބުނެފިއެވެ.
ނޭމާ ރާއްޖެ އައި ކަމަށް ދެކެވޭ ވާހަކަ އާއި ގުޅިގެން ޓީއެމްއޭގެ ސީނިއަރ މުވައްޒަފެއް 'ވޮއިސް' އަށް މައުލޫމާތު ދެއްވަމުން ވިދާޅުވީ، ޓީއެމްއޭއިން މިވަގުތު ކުރިއަށްދާ ޓްރެއިނިންގ އެއްގައި ނޭމާގެ ނަމުގައި ރިސޯޓެއްގައި ބުކިންގ ހަދާފައިވާނެ ކަމަށެވެ.
"ނޭމާގެ އިތުރުން ޑޭވިޑް ބެކަމް އަދި ކްރިސްޓިއާނޯ ރޮނާލްޑޯ ގެ ނަމުގައި ވެސް އެ ރިސޯޓުގައި ވަނީ ނަންނޯޓް ކުރެވިފައި." ޓީއެމްއޭގެ ސީނިއަރ މުވައްޒަފު ބުންޏެވެ.
ޓީއެމްއޭއިން ވޮއިސް އާއި މައުލޫމާތު ހިއްސާ ކުރެއްވި މުވައްޒަފު ވަނީ، އެ ޓްރެއިނިންގ ގައި ހަދާފައިވާ ބުކިންގ ތަކުގެ ތަފްސީލް ވެސް ވޮއިސް އާއި ހިއްސާ ކުރައްވާފައެވެ.
ފީފާ ވޯލްޑްކަޕުގެ ކުއާޓާފައިނަލުގެ ފުރަތަމަ މެޗުގައި ޕެނަލްޓީން ބްރެޒިލްގެ މައްޗަށް ކްރޮއޭޝިއާ ކުރި ހޯދުމާއި ގުޅިގެން ބްރެޒިލް އަށްވަނީ ވޯލްޑްކަޕު ނިމިފައެވެ.
އެކަމާއި ގުޅިގެން ނަފްސާނީގޮތުން ވެސް ވަރަށް ބޮޑަށް ބަލިކަށިވެފައިވާ ކަމަށް ނޭމާ ބުނެފައިވާއިރު، އޭނާ އެހާ ދެރަވީ މިއީ އޭނާގެ އެންމެ ފަހުގެ ވޯލްޑްކަޕް ކަމަށް ވުމުން ކަމަށް ގިނަ ބަޔަކު އައީ ބުނަމުންނެވެ.
އެހެންނަމަވެސް، އުމުރުން 30 އަހަރުގެ ނޭމާ ވަނީ 2026 ވަނަ ވޯލްޑް ކަޕްގައިވެސް އޭނާ ކުޅޭނެކަން އިއުލާންކޮށްފައެވެ.
ނޭމާ ވަނީ މިހާތަނަށް 3 ވޯލްޑްކަޕްގައި ކުޅެފައިވެއެވެ. އަދި އޭނާ ވަނީ ބްރެޒިލް އަށް 124 މެޗު ކުޅެ 77 ލަނޑުޖަހާ، އެ ޤައުމުގެ ޤައުމީ ޓީމަށް އެންމެ ގިނަ ގޯލު ޖެހި ޕެލޭގެ ރެކޯޑާއި އެއްވަރުކޮށްފައެވެ.
Advertisement
This content is created and paid for by advertisers and does not involve Voice Journalists
