ފުޓުބޯޅަގައި ތާރީޚުގައި ފާހަގަކޮށްލެވޭ ހުނަރުވެރި ލެޖެންޑުންނާއި, ޤަތަރުގައި މިހާރު ކުރިއަށްދާ ވޯލްޑްކަޕް ފުރިހަމަ ކަމާއިއެކު ބޭއްވުމަށް އެކި ގޮތްގޮތުން މަސައްކަތް ކުރި، މަސައްކަތްތެރިންނާއި ދެމެދު އެކުވެރިކަމުގެ ފުޓްބޯޅަ މެޗެއް ބާއްވައިފިއެވެ. 

ގާތްގަނޑަކަށް 5,400 އޯޑިއަންސްގެ ކުރިމަތީގައި އޮތް މި މެޗު ކުޅެފައިވަނީ ގަތަރުގެ އަލް، ޘުމާމާ ސްޓޭޑިއަމް ގައެވެ. އެ ސްޓޭޑިއަމްގައި ވޯލްޑްކަޕްގެ 8 މެޗުވަނީ ކުޅެފައެވެ. 

ފީފާގެ ރައީސް އިންފެންޓީނޯ ރެފްރީކަން ކޮށްފައިވާ މި މެޗުގައި ވޯލްޑްކަޕްގެ ކަންކަން އިންތިޒާމް ކުރުމުގައި އުޅުނު 24 މަސައްކަތްތެރިން ވަނީ ބައިވެރިވެފައެވެ. އަދި ފީފާ ލެޖެންޑުންގެ ތެރޭގައި ހިމެނޭ، ކަފޫ، ރޮބާޓޯ ކާލޯސް، އެލެސެންޑްރޯ ޑެލް ޕިއޭރޯ ފަދަ ހުނަރުވެރި ކުޅުންތެރިން ހިމެނެއެވެ. 

Advertisement

ފީފާއިން މިފަދަ މެޗެއް އިންތިޒާމް ކުރުމާއި ގުޅިގެން އެކަމަށް ޝުކުރު އަދާކޮށް އިންގްލެންޑް ގެ ކުރީގެ ކެޕްޓަން ޖޯން ޓެރީ ވަނީ، ފީފާ ވޯލްޑްކަޕް މިފަދަ ފުރިހަމަ ކަމާއި އެކު އިންތިޒާމުކުރުމުގައި ގަދައަޅައި މަސައްކަތް ކުރި މަސައްކަތް ތެރިންނަށް އެފަދަ ބޮޑު ފުރުސަތެއް ދިނުމަށް ފީފާއިން މިފަދަ ކަމެއް ކުރީތީ ތައުރީފް ކޮށްފައެވެ. 

އަދި މީގެ އިތުރުން، ފީފާގެ ލެޖެންޑުންނާއިއެކު މިފަދަ މެޗެއްގައި ކުޅެލަން ފުރުސަތު ލިބުމުން ވަރަށް ހިތްހަމަޖެހޭ ކަމަށް، މަސައްކަތް ތެރިންގެ ޓީމުގައި ހިމެނޭ މީހަކުވެސްވަނީ ބުނެފައެވެ.