ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކަާރުގެ އެންމެ ބިޔަ އެއް މަޝްރޫއު ކަމުގައިވާ ތިލަމާލެ ބުރިޖުގެ މަސައްކަތް ހަވާލު ކޮށްފައި އޮތް އިންޑިއާގެ އެފްކޮންސް ކުންފުނިން މިހާތަނަށް ކުރި މަސައްކަތައް އަގު ދީފައި، ބުރިޖު އަޅަން އެކަށީގެންވާ ބަޔަކު ހޯދަން ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހްމަދު ޠާރިގު (ޓޮމް) އެދިއްޖެއެވެ.
ބުރިޖުގެ ތަނބެއް ޖެހުމުގެ މަސައްކަތް ކުރިއަށް ދަނިކޮށް ކްރޭނެއް ބިންދައިގެން ގޮސް، ކްރޭންގެ ބައެއް މޫދަށް ވެއްޓުނު މަންޒަރު ފެންނަ ވީޑިއޯއެއް އާއްމުކޮށް، ރައީސް ޞާލިހު ޓެގް ކުރައްވައި ޠާރިގު ކުރެއްވި ޓްވީޓެއްގައި ވިދާޅުވީ، ރައްޔިތުންގެ ބޮލުގައި ބިލިއަނުން ދަރަނިއަޅުވާފައި މިއީ ކުރަން ހެޔޮ ނުވާނެކަމެއް ކަމަށެވެ.
"އެފްކޮންއަށް ކުރިމަސައްކަތައް ވާއަގު ދީފައި، ބްރިޖްގެ މަސައްކަތް ކުރަން ކަމަށް އެކަށީގެންވާ ބަޔަކު ހޯދާށެވެ.ރައްޔިތުންގެ ފައިސާއިން ބިލިއަނެއް ތިކުރައްވަނީ އިސްރާފެވެ." ޠާރިގު ވިދާޅުވިއެވެ.
ޕްލޭނިންގ މިނިސްޓްރީން ބުނެފައިވާ ގޮތުގައި ޕްލެޓްފޯރމްގައި ބަހައްޓާފައިވާ މޯބައިލް ކްރޭން މޫދަށް ވެއްޓުނީ، ޕައިލިންގް މަސައްކަތް ފެށުމަށް ބޭނުންވާ ބައެއް މެޓީރިއަލް އުފުލަނިކޮށް ކްރޭންގެ ބޫމް ފެއިލްވެގެން ކަމަށެވެ.
ތިލަމާލެ ބްރިޖް ގެ މަސައްކަތް ކުރުމަށް ގެންގުޅުނު ޕްލެޓްފޯމެއްވެސް މީގެ ކުރިން ވަނީ ފަރަށް އަރައިގެން ފަރަށްވެސް ބޮޑެތި ގެއްލުންތަކެއް ވެފައެވެ. އެކަމާއި ގުޅިގެންވެސް ގިނަ ބައެއްގެ ފާޑުކިޔުންތައް ބްރިޖް މަޝްރޫއު އަށް އަމާޒުވެގެން ދިޔައެވެ.
Advertisement
This content is created and paid for by advertisers and does not involve Voice Journalists
