ހ. ޝީރީން ވިލާގައި އަނިޔާވެރިގޮތަކަށް މަރާލާފައި އޮތްވާ ފެނުނު ޝިއާއު މުހައްމަދު ސައީދު (22 އަހަރު) ގެ މަރުގެ މައްސަލާގައި ދައުވާކުރުމާއިމެދު މިމަހުގެ ތެރޭގައި ގޮތެއް ނިންމާނެކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފިއެވެ.
މިއަހަރުގެ އޮގަސްޓް މަހުގެ ހަވަނަ ދުވަހުގެ ރޭ އަނިޔާވެރި ގޮތަކަށް މަރާލެވުނު ޝިއާއުގެ މަރުގެ މައްސަލައާއި ގުޅިގެން ފުލުހުން ހައްޔަރު ކޮށްފައިވަނި ކުޅަދާނަ ސްކޭޓަރ އަލީ ޝާހިލެވެ. ޝާހިލް ހައްޔަރުކުރީ ކުށުގެ ވެށިން މަސްތުގެ ހާލަތުގައި ހުއްޓައި ކަމަށް ފުލުހުން ބުނެފައިވެއެވެ.
މި މައްސަލަ އާއި ގުޅިގެން އޮކްޓޯބަރ މަހުގެ 15 ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ޝިއާއުގެ މަރާއި ގުޅިގެން ތުހުމަތުކުރެވޭ އަލީ ޝާހިލްގެ މައްޗަށް ގަސްދުގައި މީހަކު މެރިކަމުގެ ކުށް ސާބިތުވާ ވަރަށް ހެކި ލިބިފައިވާކަމަށެވެ. އެހެން ނަމަވެސް މިހާތަނަށް އޭނާ މަރާލި ސަބަބު ނުވަތަ މޯޓިވް ކަށަވަރުކުރެވިފައި ނުވާކަމަށެވެ.
ޝާހިލްގެ ފަރާތުން ފުލުހުންނަށް އެއްބާރުލުން ދިން ނަމަވެސް، ސީދާ އެ މައްސަލައިގައި އޭނާ އެކަށީގެންވާ މައުލޫމާތުތައް ހިއްސާކުރަމުން ނުދާކަމަށް ފުލުހުން ބުންޏެވެ.
އެ މައްސަލައާއި ގުޅިގެން މިހާރު ކުރެވެމުންދާ މަސައްކަތަކީ މޯޓިވް ދެނެގަތުމުގެ މަސައްކަތްކަން ފުލުހުން ހާމަކުރިއެވެ.
އެގޮތުން މިހާރު ޝާހިލްގެ ފޯނުގައި ހުރި ޑޭޓާ އެކްސްޓްރެކްޓު ކުރުމުގެ މަސައްކަތް ކުރަމުންދާކަމަށާއި، އަދި އެ ޑޭޓާތަކުގެ އަލީގައި މޯޓިވް ދެނެގަނެވޭނެކަމަށް ގަބޫލުކުރައްވާކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ ކުރިއަށް އޮތް ދެ ހަޕްތާ ތެރޭގައި އެ މައްސަލައާއި ގުޅިގެން ދައުވާކުރުމަށް ޕީޖީ އޮފީހަށް ފޮނުވޭނެކަމަށެވެ. އަދި އެހާތަނަށް އެމަރުގެ މޯޓިވް ދެނެގަނެވޭނެކަމަށް ފުލުހުން ވަނީ ބުނެފައެވެ. އެހެންނަމަވެސް އޭގެ ފަހުން މަހަކަށްވުރެ ގިނަ ދުވަސް ވެފައިވާއިރު މައްސަލަ ޕީޖީއަށް ހުށަނޭޅޭއިރު، މައްސަލައާއި ގުޅޭ އިތުރު އެއްވެސް ތަފްސީލެއް ވެސް ފުލުހުން ދީފައެއް ނުވެއެވެ.
މިކަމާއި ގުޅިގެން، ޕީޖީ އޮފީހުން ބުނީ މިމައްސަލައިގެ ފުލުހުންގެ ތަހުގީގަށް ބެލުމަށްފަހު މިމަސް ނިމުމުގެ ކުރިން ދައުވާކުރުމާއި މެދު ގޮތެއް ނިންމުމަށް ހަމަޖެހިފައިވާކަމަށެވެ.
Advertisement
This content is created and paid for by advertisers and does not involve Voice Journalists
