މިރޭ ކުޅެވުނު ވޯލްޑްް ކަޕް ސެމީ ފައިނަލްގެ ދެވަނަ މެޗުގަައި މޮރޮކޯ 2-0 ން ބަލިކޮށް އެންމެ ފަހުގެ ޗެންޕިއަން ފުރާންސް މުބަރާތުގެ ފައިނަލްގެ ދެވަނަ ޖާގަ ކަށަވަރުކޮށްފިއެވެ.

މުބާރާތުގައި ހައިރާން ކުރުވަނިވި ނަތީއްޖާތަކެއް ނެރުނު މޮރޮކޯގެ ޓީމުން ސެމީ ފައިނަލާ ހަމައަށް ދަތުރުކުރީ ދުނިޔޭގެ ފުޓުބޯޅައިގެ ނަން މަޝްހޫރު ޤައުމުތައް ފަހަތަށް ޖައްސާލުމަށްފަހުއެވެ. އެގޮތުން ގްރޫޕް އެފްގެ އެއްވަނަ ޓީމުގެ ގޮތުގައި ދެވަނަ ބުރަށް މޮރޮކޯ ދަތުރުކުރީ ދުނިޔޭގެ ފުޓުބޯޅަ ރޭންކިންގެ ދެވަނައިގައި އޮތް ބެލްޖިއަމްއާއި އެންމެފަހުގެ ރަނަރަޕް ކްރޮއޭޝިއާ ފަހަތަށް ޖައްސާލުމަށް ފަހުގައެވެ.

މުބާރާތުގެ ކުއާޓާ ފައިނަލުން އެޓީމު ފުރުސަތު ހޯދީ ދެވަނަބުރުގައި ޕެނަލްޓީޖަހަައިގެން ގަދަފަދަ ސްޕެއިން ބަލިކޮށްފައެވެ. އަދި ސެމީ ފައިނަލްގެ ޖަގައެއް އެޓީމު ހޯދީ ކުއާޓާ ފައިނަލުގައި 2016 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ޗެމްޕިއަން، ޕޯޗުގަލް 1-0 ން ބަލިކޮށްފައެވެ. ސެމީ ފައިނަލާ ހަމައަށް މޮރޮކޯ ދަތުރުކުރިއިރު ބައިކޮޅަށް ވަދެފައި ވަނީ އެންމެ ލަނޑެކެވެ. އެއީވެސް އެ ޓީމުގެ ކުޅުންތެރިއެއްގެ އަތުން ބައިކޮޅަށް ވަން ލަނޑެކެވެ. އެހެންކަމުން މިހާ ހިސާބަށް އައިއިރު މޮރޮކޯ ކޮޅަށް އިދިކޮޅު ޓީމުގެ ކުޅުންތެރިއަކަށް ލަނޑެއް ޖެހިފައި ނުވާކަން ފާހަގަކޮށްލެވެއެވެ.

ނަމަވެސް މުބާރާތުގެ އެންމެ ރަގަޅު ޑިފެންސިވް ރެކޯޑެއް ދަމަހައްޓަމުންއައި މޮރޮކޯގެ ގޯލް ފުރާންސް ޓީމުން ވަނީ މެޗުގެ ވަރަށް ކުރީކޮޅު ހުޅުވާލާފައެވެ. މޮރޮކޯގެ ޕެނަލްޓީ އޭރިއާތެރެއިން އެމްބާޕޭ ފޮނުވާލި ހަމަލާއެއް މޮރޮކޯގެ ކުޅުންތެރިއެއްގެ ގައިގައި ޖެހިފައި، މުޅިން ހުސްކޮށް ހުރި ފްރާންސްގެ ޑިފެންޑަރ ތިއޯ ހެނާންޑޭޒްއަށް ލިބުމުން އޭނާ ވަނީ ހަމަޖެހިލާފައި ބޯޅަ ގޯލުގެ ތެރެއަށް ފޮނުވާލައިގެން، މެޗުގެ ފަސްވަނަ މިނެޓުގައި ފްރާންސަށް ލީޑު ނަގާދީފައެވެ.

ފުރާންސްގެ ލަނޑަށްފަހު، ފުރަތަމަ ހާފުގައި ގިނަ ވަގުތު ބޯޅަ ގެންގުޅެ މެޗު ޑޮމިނޭޓްކުރީ މޮރޮކޯ އިންނެވެ. އަދި ދެވަނަ ހާފުގައި އެޓޭކިންގް ވަރުގަދަ ކުޅުމެއް ކުޅެމުންދިޔަ މޮރޮކޯ ހިއްވަރު އެލުނީ ދެވަނަ ހާފުގެ 79 ވަނަ މިނެޓްގައި ބަދަލު ކުޅުންތެރިއެއްގެ ގޮތުގައި ކުޅެންނިކުތް ރަންޑަލް ކޮލޮ މުއާނީ ކުޅެން އެރިތާ 44 ސިކުންތުގެ ތެރޭގައި ކާމިޔާބުކުރި ގޯލާއެކު ފުރާންސް ޓީމުން ދެ ލަނޑުގެ ލީޑެއް ނެގުމުންނެވެ.

މި މޮޅާއެކު ފްރާންސް ޓީމަށް މުބާރާތުގެ ފައިނަލުގެ ފަހު ޖާގަ ކަށަވަރުވިއިރު، ފައިނަލުގައި އެޓީމު ވާދަކުރަން ޖެހޭނީ ސެމީ ފައިނަލުގެ ފުރަތަމަ މެޗުގައި 3-0 ން ކްރޮއޭޝިއާގެ މައްޗަށް ކުރިހޯދި އާޖެންޓީނާއާ ދެކޮޅަށެވެ. ފައިނަލް މެޗު ކުޅޭނީ އަންނަ އާދިއްތަ ދުވަހުގެ ރޭ ރާއްޖެ ގަޑިން ދަންވަރު 00:00 ގައެވެ.

ސެމީ ފައިނަލުން ބަލިވި ދެޓީމު، ކްރޮއޭޝިއާ އާއި މޮރޮކޯ މުބާރާތުގެ ތިން ވަނަ ހޮވާމެޗުގައި އާދިއްތަ ދުވަހުގެ ރޭ ރާއްޖެ ގަޑިން 20:00 ގައި ވާދަކުރާނެއެވެ.