ގަތަރުގައި މިހާރު ކުރިއަށްދާ ވޯލްޑްކަޕްގެ ސެމީ ފައިނަލް ގައި، އެންމެފަހުގެ ޗެންޕިއަން، ފްރާންސް އާއި ވާދަކޮށް 2-0 ގެ ނަތީޖާއިން މޮރޮކޯ ބަލިވިނަމަވެސް، އެ ޓީމަށް އެތައް ބައެއް އަންނަނީ ތައުރީފް ކުރަމުންނެވެ.  

ފެށުނީއްސުރެ ވެސް މޮރޮކޯ ޓީމުން، އަންނަނީ އެ ޓީމުން ހޯދަމުންދާ ކާމިޔާބީއަކީ ހެއްދެވި ފަރާތުން ދެއްވި އެއްޗެއް ކަމަށްބުނެ، ކޮންމެ މެޗަކަށްފަހުވެސް، މާތް ރަސްކަލާނގެ އަށް ޝުކުރު އަދާކުރުމުގެ ގޮތުން ޝުކުރުގެ ސަޖިދަ ޖަހާފައެވެ. ރޭގެ މެޗުން ބަލިވެ، މުބާރާތުން ކެޓުމުންވެސް ޓީމުގެ ކުޅުންތެރިން ވަނީ ޝުކުރުގެ ސަޖިދަ ޖަހައި، ކާމިޔާބީ އާއި ނާކާމިޔާބީގައިވެސް ހެއްދެވި ފަރާތަށް ޝުކުރު އަދާކުރުމުގެ ރީތި ސިފަ މުޅި ދުނިޔެއަށް ދައްކާލާފައެވެ. 

މީގެ އިތުރުން ވެސް، އެ ޓީމުގެ ކުޅުންތެރިންނާއި، ޢާއިލާއާއި ދެމެދުގައި އޮންނަ ލޯބި ދަނޑުމަތިން ވެސް ފެނިގެން ގޮސްފައިވާއިރު، ހުޅަނގުގެ ގައުމުތަކުންވެސް އަންނަނީ އެކަމަށް ވަރަށް ބޮޑަށް ތައުރީފް ކުރަމުންނެވެ. 

އެގޮތުން، މައިންބަފައިންނަށް ކަމޭހިތުމާއި، މައިންބަފައިން ދެކެ ވާ ލޯބި، ހާމަ ކުރުމަކީ މިހާރު ތަދު ކަމަކަށްވެފައި ވާއިރު، އެ ޓީމުގެ ކުޅުންތެރިން ވަނީ، އަދިވެސް މައިންނާއި ޢާއިލާދެކެ ލޯބިވާ، އެ ލޯބި ހާމަކޮށްދެން ދަންނަ ދަރިން ތިބިކަން ދުނިޔެއަށް ހާމަކޮށްދީފައެވެ.

ކޮންމެ މެޗަކަށްފަހު، މޮރޮކޯގެ ކުޅުންތެރިޔާ ހަކީމީ އޭނާގެ މަންމަ ކައިރިއަށް ގޮސް މަންމައަށް ދޮންދޭ މަންޒަރާއި, ޗުއާޓާ ފައިނަލް މެޗުން ލިބުނު ކާމިޔާބީ ފާހަގަ ކުރުމަށް މޮރޮކޯ ޓީމުގެ ކުޅުންތެރިންގެ ދަރިންނާއި މަންމައިން ދަނޑުމައްޗަށް ގެނެސް، ޓީމުން ދައްކާލި އުފާވެރި މަންޒަރުން އެތައް ބައެއްގެ ލޯބި ވަނީ މޮރޮކޯ ޓީމުން ހޯދާފައެވެ. 

މީގެ އިތުރުންވެސް، މޮރޮކޯ ޓީމުގެ ކުޅުންތެރިން، ފަލަސްޠީނުގެ ދިދަ ދަނޑުމައްޗަށް ގެނެސް އެ ދިދަ އާއި ފޮޓޯ ނަގާފައިވާއިރު، މިއީ ފަލަސްޠީނަކީ ދުނިޔޭގެ ބައެއްކަން އެންމެނަށް އަންގައި، އެގައުމާއި ގުޅޭތުން މައުލޫމާތު ހޯދައި، އެމީހުންގެ ހާލު ދެނެގަތުމަށް ދުނިޔެއަށް މަޖުބޫރު ކުރުވި ކަމެއް ކަމަށްވެސް ގިނަ ބަޔަކު އަންނަނީ ބުނަމުންނެވެ. 

މިފަދަ އެތައް ސަބަބުތަކަކާއި ހުރެ މެޗުން ބަލިވި ނަމަވެސް މޮރޮކޯއަށް ދުނިޔޭގެ އެންމެންގެ ލޯބިވަނީ ލިބިފައެވެ.