ގަތަރު ލުސައިލް ސްޓޭޑިއަމްގެ އަށް ވަނަ ފަންގިފިލާއިން، ޑިއުޓީގައި އުޅެނިކޮށް ކެންޔާގެ ސެކިއުރިޓީ ގާޑަކު ވެއްޓި މަރުވެއްޖެ އެވެ. މިހާދިސާގައި ނިޔާވީ ޖޯން ނޫ ކިބޫ ނަމަކަށްކިޔާ އުމުރުން 24 އަހަރުގެ ކެންޔާ ރައްޔިތެކެވެ.

ސީއެންއެން އިން ރިޕޯޓް ކޮއްފައިވާ ގޮތުގައި މި ހާދިސާ ނިޔާވި މީހާ ދޯހާގެ ހަމަދު ޖެނެރަލް ހޮސްޕިޓަލުގެ އައިސީޔޫގައި އެޑްމިޓްކުރި ކަމުގެ ރެކޯޑްތައް ވަނީ ހޯދާފަ އެވެ. ޖޯން ހޮސްޕިޓަލުގައި އެޑްމިޓްކުރީ ބޮލަށް ސީރިއަސް އަނިޔާތަކެއް ލިބި، މޫނު ފަޅައިގެން ދިއުމުގެ އިތުރުން އުނަގަނޑުގެ ކަށިގަނޑު ފަޅައިގެން ދިއުމުންނެވެ. މެޑިކަލް ޓީމުން ޖޯން ސަލާމަތްކުރެވޭތޯ ކުރެވެން ހުރި ހުރިހާ މަސައްކަތެއް ކުރި ކަމަށާއި  ޖޯން ނިޔާވީ ހޮސްޕިޓަލްގައި ފަރުވާ ދެމުން ދަނިކޮއްކަމުގައި ވޯލްޑް ކަޕް އިންތިޒާމްކުރާ ފަރާތުން ނެރުނު ބަޔާނެއްގައި ބުނެފައި ވެއެވެ.

އަދި ޖޯން ނިޔާވީ ޑިސެމްބަރު މަހުގެ 13 ވީ އަންގާރަ ދުވަހު ކަމަށާއި މިކަން ޖޯންގެ އާއިލާއަށް އަންގާފައި ވާނެކަން އެ ބަޔާނުގައި ތަފްސީލުކޮށް ދީފައިވެ އެވެ. މިހާދިސާ އާއި ގުޅިގެން ޖޯންގެ ކޮއްކޮ އަންވާޖިރު ސީއެންއެންއަށް ދިން އިންޓަވިއުއެއްގައި ބުނީ ޖޯންއަށް އިންސާފު ހޯދައިދިނުމަށް މަސައްކަތް ކުރާނެ ފައިސާ އެމީހުންގެ އަތުގައި ނެތް ކަމަށާއި ނަމަވެސް ވީގޮތް އޮޅުން ފިލުވަން ބޭނުންވާ ކަމަށެވެ.

Advertisement