އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަށް ކާމިޔާބީ ލިބޭނެ ކަމަށް ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރުމުގެ ފުރުޞަތު އިއްޔެ ހުޅުވާލާފައިވާއިރު، އެކަން ކުރި ގޮތާއިމެދު، އެމްޑީީޕީގެ ރައީސް، މުހައްމަދު ނަޝީދުގެ ފެކްޝަނުގައި ހިމެނޭ ބައެއް މެންބަރުން ނުރުހުން ފާޅުކުރެއްވުމާއި ގުޅިގެން ނިހާދު ކުރެއްވި ޓްވީޓްގައި ވިދާޅުވީ ޕާޓީގެ ޕްރައިމަރީއަށް ހުލުވާލާފައިވާަމަށާއި، އެމްޑީޕީން ކަން ކޮށްފައިވަނީ އެޕާޓީން މީގެ ކުރިންވެސް އަމަލުކުރަމުންދާ ގޮތައި އެއްވެސް ތަފާތެއް ނެތި ކަމަށެވެ.

"ބަހަނާ ނުދައްކާ، ކުރިމަތިލައްވަން ބޭނުން ބޭފުޅުން ކުރިމަތިލައްވަންވީ. އިންތިހާބުގެ ނަތީޖާ އިއްޔެގެ އިންތިހާބުންވެސް ސާފު. ރައީސް ޞާލިހު ހޮވޭނެ. އެމްޑީޕީ ވެރިކަމެއް ބޭނުން." ނިހާދު ވިދާޅުވިއެވެ. 

އެމްޑީޕީގެ ޕްރައިމަރީގައި ބައިވެރިވުމުގެ ފުރުޞަތު މިހާރު ހުޅުވާލާފައިވާއިރު، ރައީސުލްޖުމްހުރިއްޔާ އިބްރާހީމް މުހައްމަދު ޞާލިހާއި ރައީސް ނަޝީދު ވެސް ވަނީ އެ ޕްރައިމަރީ ގައި ވާދަކުރައްވާނެ ކަމަށް ވިދާޅުވެފައެވެ.  އެކަމާއި ގުޅިގެން އެމްޑީޕީ ދެ ފެކްޝަނަކަށް ބެހިގެން ގޮސްފައި ވާއިރު ނިހާދު އަކީ ރައީސް ޞާލިހަށް ވަރަށް ބޮޑަށް ތައުރީފް ކުރައްވާ އެމަނިކުފާނުގެ ފެކްޝަނުގެ ބޭފުޅެކެވެ.