ރޭ އޮތް ވޯލްޑް ކަޕް ފުޓްބޯޅަ މުބާރާތުގެ އިނާމު ދިނުމުގެ ރަސްމިއްޔާތުގައި މެސީ ތަށި އުފުލާލަން ދިޔުމުން އޭނާއަށް ތަށި ހަވާލުކުރުމުގެ ކުރިން، ޤަތަރުގެ އަމީރު ތަމީމް ބިން ޙަމަދު އަލް ޘާނީ އޭނާ އަށްދިން ކަޅުކުލައިގެ ތުނި ކޯޓް، "ބީޝްތް" އަށް ފާޑުކިޔައި އިނގިރޭސި ވިލާތުގެ ނޫސްވެރިއެއް ކުރި ޓްވީޓް ޑިލީޓް ކޮށްލައިފިއެވެ. 

ބީޝްތަކީ ޢަރަބި ދުނިޔޭގައި މީގެ އެތައް ހާސް އަހަރެއް ކުރިން ފެށިގެން ބޭނުން ކުރަމުން އަންނަ އަންނައުނެކެވެ. އެއީ ފިރިހެނުންގެ ޘަޤާފީ ހެދުމެކެވެ. އަދި އެއީ ދަރަޖައެއް ލިބިފައިވާ އަދި ޝާހީކަމާއި މުއްސަނދިކަންވެސް ރަމްޒުކޮށްދޭ ހެދުމެކެވެ. ވޯލްޑް ކަޕް ޓްރޮފީ އުފުލާލުމުގައި ޘަޤާފީ ހެދުން އެޅުމަކީ އާންމުކޮށް ފެންނަ މަންޒަރެއް ނޫން ނަމަވެސް މިފަހަރު މެސީ ބީޝްތް ލައިގެން ތަށި އުފުލާލުމުން ވޯލްޑް ކަޕްތަކުގެ ތާރީޚުގެ ތެރެއަށް އޭނާ ވަދެގެންދާނެއެވެ.

އެހެންނަމަވެސް އޭނާ ވޯލްޑް ކަޕް ތައްޓާއި ހަވާލުވުމުގެ ކުރިން، ގަތަރުގެ އަމީރު ލައްވައިދިން ބީޝްތު އަކީ ކޮން އެއްޗެއްކަން ގިނަ ބަޔަކަށް ނޭނގި، ހުޅަނގުގެ ގައުމުތަކުގެ ގިނަ މީހުންގެ ފާޑުކިޔުންތައް ވަނީ އޭނާއަށް އަމާޒުވެފައެވެ. 

އެގޮތުން، އިނގިރޭސި ވިލާތުގެ މަޝްހޫރު ނޫސްވެރިއެއް ކަމަށްވާ ޑޭލެނިއަ ވޯކާ (ޑޭން ވޯކާ) ވަނީ، މެސީ ލައްވާފައި ހުރި ކޯޓުލުމުން ސަލާމަތްވި ކަމަށްޓަކައި ފްރާންސްގެ ހުނަރުވެރި ކުޅުންތެރިޔާ ކިލިއަން އެމްބާޕޭ ޝުކުރުކުރާނެ ކަމަށެވެ. 

ޑޭން ވޯކާގެ މި ޓުވީޓަށް ވަރަށް ގިނަ ބައެއްގެ ފާޑުކިޔުންތައް ވަނީ އަމާޒުވެފައެވެ. އެގޮތުން، ބީޝްތް އަކީ ކޮން އެއްޗެއްކަމާއި، އޭގެ ހައިބަތު ނޭނގި ހުރެ އެފަދައިން ފާޑުކިޔުމުން އެނގެނީ ތަންދޮރު ނުދަންނަ ކަން ކަމަށާ، އެކަމުންވެސް ހުޅަނގުގެ ގައުމުތަކުން މުސްލިމުންނާއި ދެކޮޅުވެރި މިންވަރު އެނގޭ ކަމަށް ބުނެފައިވެއެވެ.