އެމްޑީޕީގެ ރިޔާސީ ޕްރައިމަރީއަށް ވާދަކުރުމުގެ ފުރުސަތު ހުޅުވާލުމާއިއެކު، ރައީސުލްޖުމްހުރިއްޔާ އަދި އެމްޑީޕީގެ އިސް ލީޑަރު އިބްރާހިމް މުހައްމަދު ޞާލިހް، އެމަނިކުފާނުގެ ކެމްޕޭންގަައި އިސްކޮށް އުޅުއްވާނެ ބޭފުޅުން ހަމަޖެއްސެވުމުގެ ކަންކަން ފައްޓަވައިފިއެވެ.
ރައީސް ޞާލިހުގެ ކެމްޕޭންގެ އިދާރީ މަސައްކަތުގައި އިސްކޮށް ހުންނެވި ބޭފުޅަކު "ވޮއިސް" އަށް މައުލޫމާތު ދެއްވަމުން ވިދާޅުވީ، ރޭ އެމަނިކުފާނު ބޭއްވެވި ބައްދަލުވުމުގެ ކުރީން އިއްޔެ ހަވީރު އޮތް ބައްދަލުވުމެއްގައި ރައީސް ޞާލިހުގެ ކެމްޕޭންގައި އިސްކޮށް ހަރަކާތްތެރިވާނެ ބޭފުޅުން ހަމަޖެއްސެވުމުގެ މަސައްކަތް ފައްޓަވާފައިވާ ކަމަށެވެ.
އެގޮތުން ރައީސް ޞާލިހުގެ މުޅި ކެމްޕޭންގެ އިސް މެނޭޖަރެއްގެ ގޮތުގައި ކިނބިދޫ ދާއިރާގެ މަޖިލިސް މެންބަރު މުހައްމަދު ނާޝިޒު ހަމަޖެއްސެވުމުގެ ވިސްނުން އެމަނިކުފާނު ގެންގުޅުއްވާއިރު، މާލޭ ސިޓީގައި ކުރިއަށްދާ ކެމްޕޭން ހަރަކާތްތަކުގައި އިސް ފަރާތެއްގެ ގޮތުން ޑިފެންސް މިނިސްޓަރު މާރިޔާ އަހުމަދު ދީދީ ކަނޑައެޅުއްވުމަށް ރައީސް ޞާލިހު ނިންމަވާފައިވާ ކަމަށް އެ ފަރާތުން މައުލޫމާތު ދެއްވާފައިވެއެވެ.
މީގެ އިތުރުން ކެމްޕެއިންގެ ތެެރެއިން ހަރުގެ ޖަލްސާތައް ފެއްޓެވުމަށް ރައީސް ޞާލިހު ނިންމަވާފައިވާއިރު، އެ މަސައްކަތުގައި އިސްކޮށް ހަރަކާތްތެރިވެ ވަޑައިގަންނަވާނީ ރީކޯ މޫސާ މަނިކެވެ. އަދި، ތުޅާދޫ ދާއިރާގެ މެންބަރު އަދި ޖޭއެސްސީގެ ރައީސް ހިސާން ހުސައިން މި ފަހަރު ހުންނަވާނީ ރައީސްގެ ކެމްޕޭންގައި ލީގަލް މަސައްކަތްތަކުގެ އިސް ބޭފުޅެއްގެ ގޮތުގައި ކަމަށްވެސް "ވޮއިސް" އަށް މައުލޫމާތު ދެއްވި ފަރާތުން ވިދާޅުވިއެވެ.
މި ބޭފުޅުންގެ ތެރެއިން މާރިޔާ އަކީ 2018 ވަނަ އަހަރުގެ ރިޔާސީ އިންތިހާބުގައި ރައީސް ޞާލިހްގެ ކެންޕޭން ތަރުޖަމާނެވެ. އަދި ހިސާން އަކީ ރައީސް ނަޝީދުގެ ލީގަލް މަސައްކަތްތަކުގައި ކުރީން އިސްކޮށް ހުންނެވި ބޭފުޅެއްކަންވެސް ފާހަގަކޮށްލަންޖެހެއެވެ.
އެމްޑީޕީ ރިޔާސީ ޕްރައިމަރީގައި ރައީސް ޞާލިޙާއި ދެކޮޅަށް ވާދަކުރައްވާނީ އެޕާޓީގެ ރައީސް، އަދި ކުރީގެ ރައީސް މުހައްމަދު ނަޝީދެވެ.
Advertisement
This content is created and paid for by advertisers and does not involve Voice Journalists
