ސްޓެލްކޯއިން ފްލެޓް ލިބުނު ފަރާތްތަކުން ފައިސާ ދައްކަން ޖެހޭ މުއްދަތު އިތުރުކޮށްދީ، ފްލެޓް ނުލިބި ތިބި މުވައްޒަފުންނަށް ބޯހިޔާވަހިކަން ހޯދުމުގައި އެހީތެރިވެދޭ ސްކީމަކާއި ސްކޮލަޝިޕްތަކެއް ތައާރަފްކުރަން ނިންމާފައިވާކަމަށް އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފު ވިދާޅުވެއްޖެ އެވެ.

ކަރަންޓުގެ ހިދުމަތުގައި 73ވަނަ އަހަރު ފާހަގަކުރަން ބޭއްވި ޖަލްސާގައި ޝަރީފު ވިދާޅުވީ އެ ކުންފުނިން މިހާތަނަށް ހިންގި އެންމެ ކާމިޔާބު ޕްރޮޖެކްޓަކީ ހައުސިން ޕްރޮޖެކްޓް ކަމަށެވެ. މި ޕްރޮޖެކްޓް ގެ ދަށުން ސްޓެލްކޯއިން އެޅި 360 ފްލެޓް މިދިޔަ އޮގަސްޓު މަހު މުވައްޒަފުންނާ ހަވާލުކޮށްފައިވެއެވެ.

އަދި އޭގެ ތެރެއިން ފްލެޓް ނުލިބި ތިބި މުވައްޒަފުންނަށް ހާއްސަކޮށްގެން ވެސް އެހެން ފަރާތްތަކުގެ އަތުން ފްލެޓް ގަތުމުގައި އެހީތެރިކަން ފޯރުކޮށްދޭ، ހާއްސަ ސްކީމެއް އެކުލަވައިލާ އެކަމުގެ ތަފްސީލުތައް ވަރަށް އަވަހަށް އިއުލާނު ކުރައްވާނެ ކަމަށް އޭނާ ވިދާޅުވި އެވެ.

"މިހާރު ސްޓެލްކޯގެ މެނޭޖުމެންޓުން މިކަމާ ގުޅިގެން ކަނޑައަޅާފައިވާ ގޮތުގައި ޑިސެމްބަރު މަހުގެ ނިޔަލަށް އެޑްވާންސް ޕޭމަންޓް ނުދެއްކިވާ ސްޓާފުންގެ އެޑްވާންސް ޕޭމަންޓް ޕްރައިމަރީ އެމައުންޓުގެ ތެރެއަށް ހިމަނައިގެން ކުރިއަށް ގެންދަން ސްޓެލްކޯގެ ބޯޑުން މިހާރު ވަނީ ނިންމާފަ. އަދި ހަމަ އެއާއެކީގަ މުވައްޒަފުންގެ މުސާރަ އާއި މުވައްޒަފުން ފުލެޓަށް ދައްކަން ޖެހޭ ކުލީގެ އަގު ކުޑަކުރުމަށްޓަކައި މަޝްވަރާކުރުމަށް ފަހުގައި މިހާރު މެނޭޖުމެންޓުން ވަނީ 18 އަހަރުގެ ބަދަލުގައި 25 އަހަރަށް ބަދަލުކޮށް މުވައްޒަފުން ދައްކަން ޖެހޭ އަދަދު ކުޑަކޮށްފަ،" ޝަރީފު ވިދާޅުވިއެވެ.

މިއާއެކު ޝަރީފު ވިދާޅުވީ، މިހާރު ދޫކޮށްފައިވާ 360 ފްލެޓް ލިބުނު ފަރާތްތަކަށް ފައިސާ އަނބުރާ ދައްކަން ޖެހޭ މުއްދަތު 18 އަހަރުން 25 އަހަރަށް އިތުރު ކުރަން ނިންމައި އެކަން ބޯޑަށް ހުށަހަޅާފައިވާ ކަމަށާ، މި އަހަރުގެ ނިޔަލަށް އެޑްވާންސް ޕޭމަންޓް ނުދެއްކި ތިބި ފަރާތްތަކަށް ފްލެޓްގެ ޖުމްލަ އަގުގެ ތެރެއަށް އެ ފައިސާ ހިމަނައިގެން ކުރިއަށްގެންދަން ނިންމައިފައިވާ ކަމަށެވެ. 

ބޯހިޔާވަހިކަމުގެ ސްކީމްގެ އިތުރުން މަތީ ސާނަވީ އިމްތިހާނު ނިންމާ ދެ ދަރިވަރަކަށް ސްޓެލްކޯއިން ބޭނުންވާ ދާއިރާއަކުން ކިޔެވުމުގެ ފުރުސަތު ފަހިކޮށްދިނުމަށް މަޝްވަރާ ކުރަމުން އަންނަކަމަށްވެސް ޝަރީފް ވިދާޅުވިއެވެ. އެގޮތުން ދިވެހިން ތަމްރީނުކުރުމަށާއި މުވައްޒަފުންގެ ހުނަރު އިތުރުކުރުމަށް ކޮންމެ އަހަރަކު 7 މިލިއަން ރުފިޔާ ހަރަދުކުރާނެކަމަށް އޭނާ ވިދާޅުވިއެވެ.

"ރާއްޖޭގެ މަތީ ސާނަވީ ނިންމާ ކުދިންގެ ތެރެއިން ރަނގަޅު ނަތީޖާ ހޯދާ ކުދިންގެ ތެރެއިން ކޮންމެވެސް ދެ ކުއްޖަކު؛ އަންހެން ކުއްޖަކާ ފިރިހެން ކުއްޖަކު، އަޅުގަނޑުމެން ސްޓެލްކޯއިން ބޭނުންވާ ދާއިރާއަކުން ކިޔެވުމުގެ ފުރުސަތު ހުޅުވާލުމާ ބެހޭ ގޮތުން މަޝްވަރާ ކުރެވެމުން ދަނީ." އޭނާ ވިދާޅުވިއެވެ.