ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހުވަދުއަތޮޅު އުތުރުބުރީގެ ތިން ރަށަކަށް ވަޑައިގެންނެވުމަށް ހަމަޖެހިއްޖެއެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު މިއަދު ކުރެއްވި ޓުވީޓެއްގައި ވިދާޅުވީ، ރައީސް ޞާލިހު ހުވަދު އަތޮޅު އުތުރުބުރީ ދާންދޫ، ނިލަންދޫ އަދި މާމެންދޫއަށް ކުރައްވާ ދެ ދުވަހުގެ ދަތުރުފުޅެއްގައި މާދަމާ ފުރާވަޑައިގަންނަވާނެ ކަމަށެވެ.
ރައީސް ޞާލިހުގެ މި ދަތުރުފުޅުގައި އެ ރަށްތަކުގެ ނިމިފައި ހުރި ތަރައްޤީގެ މަޝްރޫއުތައް އިފްތިތާޙްކޮށްދެއްވުމަށް ހަމަޖެހިފައިވާ ކަމަށްވެސް މިއުވާން ވިދާޅުވިއެވެ.
މީގެ އިތުރުން، އެ ތިން ރަށުގެ ކައުންސިލު އިދާރާތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކާ ރައީސް ބައްދަލުކުރައްވާނެ ކަމަށް ވެސް މިއުވާން ވިދާޅުވިއެވެ.
މިއުވާން ވިދާޅުވީ ދަތުރުފުޅަށްފަހު ރައީސް އެނބުރި މާލެ ވަޑައިގަންނަވާނީ ހޮނިހިރު ދުވަހު ކަމަށެވެ. އަދި އެއަށްފަހު ގައުމީ އެއްބައިވަންތަ ކަމުގެ ދުވަސް ފާހަގަކުރުމަށް މ އަތޮޅު ކޮޅުފުއްޓަށްވެސް ރައީސް ވަޑައިގަންނަވާނެ ކަމަށް މިއުވާން ވިދާޅުވިއެވެ.
"މި މަހުގެ 26 ވަނަ ދުވަހު، ގައުމީ އެއްބައިވަންތަކަމުގެ ދުވަސް ފާހަގަ ކުރެއްވުމަށް މ އަތޮޅު ކޮޅުފުއްޓަށް ރައީސުލް ޖުމްހޫރިއްޔާ ވަޑައިގަންނަވާ ގޮތަށް މިވަނީ ހަމަޖެހިފަ" މިއުވާން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
