ޖުޑިޝަލް ސާވިސް ކޮމިޝަން (ޖޭއެސްސީ) ހިނގަނީ އެތެރެ ނޭނގޭ، ގޮތް ނޭނގޭ ގޮތަކަށް ކަމަށާއި ޖޭއެސްސީން ނިންމާ ނިންމުންތައް އަންނަނީ “އަނދިރި ކޮޓަރި” އެއްގެ ތެރެއިން ކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް) ގެ ރައީސް އަހުމަދު ފާރިޝް މައުމޫން ވިދާޅުވެއްޖެއެވެ.
ފާރިޝް މިހެން ވިދާޅުވީ، ޖޭއެސްސީ އެކުލެވިފައިވާ ގޮތް ބަދަލު ކުރުމަށް ސަރުކާރުން ކުރަމުންދާ މަސައްކަތްތަކާއި ގުޅިގެން ޖޭއެސްސީއަށް ގެންނަން ފެންނަ ކަމަށް އެމްއާރުއެމްއަށް ގަބޫލު ކުރެވޭ ބަދަލުތަކާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައެވެ.
ޖޭއެސްސީގައި މަސައްކަތް ކުރަން ލިބުނު ފުރުސަތުގައި، ޖޭއެސްސީގެ ކަންކަން ބޮއްސުންލައިގެން ގޮސްފައިވާ މިންވަރު އެނގިގެން ދިޔަ ކަމަށް ފާރިޝް ވިދާޅުވިއެވެ.
އެގޮތުން ފާރިޝް ފާހަގަ ކުރެއްވި ކަންތައްތަކުގެ ތެރޭގައި، ޖަލްސާތަކުގެ ހާޒިރީއާއި ޔައުމިއްޔާ ނުބެލެހެއްޓުމާއި ޖަލްސާތައް ރަނގަޅަށް ރިކޯޑް ނުކުރެވުން ހިމެނެއެވެ.
މީގެ އިތުރުން، ޖޭއެސްސީ މިހާރު އެކުލަވާލެވިފައިވާ ގޮތަށް ބަދަލު ގެންނައިރު، ދެފުށް ފެންނަ ގޮތަށް މައްސަލަތައްތައް ނިންމާ ތަނަކަށް ޖޭއެސްސީ ވާންޖެހޭ ކަމަށް ފާރިޝް ވިދާޅުވިއެވެ.
ޖޭއެސްސީއަށް ބަދަލުތައް ގެންނައިރު އެންމެ މުހިންމު ކަމަކަށް ވާން ޖެހޭ ކަމަށް ފާރިޝް ވިދާޅުވީ، ސިޔާސީ ނުފޫޒުން އެއްކިބާވެފައިވާ ތަނަކަށް ބަދަލު ކުރުމެވެ. އެހެންކަމުން ވޯޓު ދީގެން މެމްބަރުން ހޮވުމުގެ ބަދަލުގައި މަގާމަށް ގާބިލު ފަރާތްތައް ހޮވުން ރަނގަޅުވާނެ ކަމަށް ފާރިޝް ވިދާޅުވިއެވެ.
މީގެ އިތުރުން، އެމްއާރުއެމްއިން ހުށަހަޅާ ހުށަހެޅުންތަކާ އެއްގޮތަށް ޖޭއެސްސީއަށް ބަދަލު ގެނެސްފިނަމަ، ސިޔާސީ ގޮތުން ނުފޫޒު އޮންނަ އޮތުން ހައްލު ވެގެންދާނެ ކަމަށް ގަބޫލު ކުރައްވާ ކަމަށް ފާރިޝް ވިދާޅުވިއެވެ.
ޖޭއެސްސީ އިސްލާހުކުރަން މިހާރުވެސް ލަސްވެފައިވާ ކަމަށާއި މި ވެރިކަން ފެށުނު ހިސާބުން އެކަމުގެ މަސައްކަތް ފެށުނު ނަމަ މިހާރު ޖޭއެސްސީ އޮންނަނީ ޖޭއެސްސީ އިސްލާހު ކުރުމުގެ މަސައްކަތް ނިމިފައި ކަމަށް ފާރިޝް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
