ދަރިންދެކެ ލޯބިވާ ބައްޕައެއްގެ ބީދައިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގެންދަވަނީ ރައްޔިތުންގެ ހާލު ބައްލަވަމުންކަމަށް ފޮރިން މިނިސްޓަރު ޝާހިދު ވިދާޅުވެއްޖެ އެވެ. 

ޝާހިދު މިފަދައިން ވިދާޅުވެފައި ވަނީ ގއ. ދާންދޫ ބިން ހިއްކުމުގެ މަޝްރޫޢު ނިންމުމުގެ ރަސްމިއްޔާތުގައި ވާހަކަދައްކަވަމުން ނެވެ. 

ޝާހިދު ވިދާޅުވީ ގއ ދާންދޫ ބިންހިއްކުމުގެ މަޝްރޫއަކީ އާދައިގެ ކުޑަކަމެއް ނޫންކަމަށެވެ. އަދި އެކަން ސަރުކާރުން ކުރީ ކޯވިޑް ނަވާރައިގެ އެންމެ ނުރައްކާތެރި ހާލަތުގައި، ގައުމު އިގްތިސާދީ ގޮތުންވެސް ވަރަށް ބޮޑަށް ހީނަރުވެގެން ދިޔަ ހަާލަތެއްގައި ކަމަށެވެ. 

Advertisement

އެއީ ރައްޔިތުން އުފަލާއެކު ފާހަގަކޮށް އަބަދުވެސް ހަނދާނުގައި ބަހައްޓަން ޖެހޭ ކަމެއްކަމަށް ޝާހިދު ވިދާޅުވިއެވެ. އަދި ވިދާޅުވީ ރައީސް ސޯލިހަކީ ރައްޔިތުންނަށް ބޭނުންޖެހިފައިވާ ކަންތައްތައް ފުއްދުމަށް ވަރަށް ޚާއްސަ ސަމާލުކަމެއް ދެއްވާ ބޭފުޅެއްކަމަށެވެ. 

ޝާހިދު ވިދާޅުވީ ކޯވިޑް ނަވާރައިގެ ކަންކަން ރައީސް ސޯލިހު ވަރަށް ގާތުން ބަލަމުން ދިޔަކަމަށެވެ. ވަޒީރުންނާއި އެކި މަސްއޫލިއްޔަތުތައް ހަވާލުކުރެއްވުމަށްފަހު އެ ޒިންމާތައް އަދާކުރައްވާތޯ އަބަދުވެސް ބައްލަވާކަމަށް ޝާހިދު ވިދާޅުވިއެވެ. 

ޝާހިދު އިތުރަށް ވިދާޅުވީ ކޯވިޑްގެ ސަބަބުން ރާއްޖެއަށް ކާބޯތަކެތި އެތެރެކުރުމުގެ އެއްވެސް ދަތިކަމެއް ކުރިމަތި ނުވާކަމަށެވެ. އޭގެއިތުރުން ބޭރުން ގެންނަން ޖެހޭ ބޭސް ނުލިބިގެން އެއްވެސް މީހަކަށް ފަރުވާނުކުރެވި ހުންނަން ނުޖެހޭކަމަށްވެސް އޭނާ ވިދާޅުވިއެވެ. 

އެވާހަކަތަކާއި ގުޅުވާ ޝާހިދު ވިދާޅުވީ، ކޯވިޑްގެ ހާލަތުގއި ރައްޔިތުން ހާލުގައި ނުޖެހުނީ ރައީސް ސޯލިހު ހިކުމްތަތެރިކަމާއެކު އެޅި ފިޔަވަޅުތަކުގެ ސަބަބުންކަމަށެވެ. އަދި ރައްޔިތުންގެ ހާލު ގާތުން ބައްލަވާ، ކަންކަން މެނޭޖު ކުރެއްވުމަށް އެމަނިކުފާނު ދެއްވި އިރުޝާދުތަކާއި އެއްގޮތަށް އަމަލުކުރުމުގެ ސަބަބުންކަމަށެވެ.