ދިވެހިންގެ އެއްބައިވަންތަަ ކަމުގެ ދުވަހުގެ މުނާސަބަތުގައި، މުލަކަތޮޅު ކޮޅުފުށީގައި ބާއްވާ ރަސްމީ އިހްތިފާލުތަކުގައި ބައިވެރިވަޑައިގެން، ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އާކުރެއްވީ، ސުނާމީ އެރި ދުވަހުގެ ހިތްދަތި ތަޖުރިބާއެވެ.

ޖުމުލަ 82 މީހުން މަރުވެ، 26 މީހުން ގެއްލުނު، 26 ޑިސެމްބަރު 2004 ގައި ހިނގި ސުނާމީ ކާރިސާގެ ހަނދާންތައް އާ ކުރައްވަމުން ރައީސް ވާހަކަފުޅު ކުރިއަށް ގެންދެވީ، އިރުއިރުކޮޅުން މެދުކަނޑާލަމުންނެވެ. ލޯފުޅުން ކަރުނަ ފުހެލައްވަމުން ވާހަކަ ކުރިއަށް ގެންދެވިއިރު، އަނބިކަނބަލުން ފަޒުނާ އަހުމަދަށްވެސް އެ ވާހަކަތަކުން ނުހަނު އަސަރު ކުރުވާފައިވާތަން ފެނެއެވެ.

ރައީސް ވިދާޅުވީ، ސުނާމީ އެރި ދުވަހު އެމަނިކުފާނު ހުންނެވީ އުފަން ރަށުގައި ކަމަށާއި، އެދުވަހު ވެގެން ދިޔަގޮތް އިހުސާސް ކުރެވޭނީ އެ މަންޒަރު ފެނުނު މީހަކަށް ކަމަށެވެ. އަދި އެދުވަހު ރައީސްގެ އުފަން ރަށަށް ލިބުނު ގެއްލުމަށްވުރެ، ކޮޅުފުއްޓަށް ލިބުނު ގެއްލުން ބޮޑު ކަމަށް ރައީސް ވިދާޅުވިއެވެ.

Advertisement

"ކަން ދިމާކުރި ގޮތުން އަޅުގަނޑަށްވެސް އެ ދުވަހު ހުރެވުނީ އާއިލާއާއެކުގަ އަޅުގަނޑުގެ އުފަން ރަށުގަ. ލޮނުގަނޑު ރަށުތެރެއަށް އަރައިގެން އައިސް ގޭތެރެއަށް ވަދެ، އެ ރާޅު ފައިބައިގެން ދިޔައިރުގަ މުޅި ރަށް ދޮވެލައިގެން އެ ދިޔަ ގޮތް އެއީ، އެ ދުވަހު އެތާ ހުރި މީހަކަށް ނޫނިއްޔާ އިހުސާސް ކުރެވޭ ކަންތައްތަކެއް ނޫން. އަޅުގަނޑުގެ އަންހެނުންނާ ދެ ކުދިންނާ މުޅި އާއިލާ އެކުގަ ތިބީ ރަށުގަ. ނުވަ އަހަރުގެ އަޅުގަނޑުގެ ދޮށީ ދަރިފުޅު އިނީ ގޭ ކުރިމަތީ ހުރި ގަހެއްގަ. ހަތް އަހަރުގެ ފިރިހެން ދަރިފުޅު ހުރީ ފާރެއް މަތީގަ. މަންމަޔާ ހުރިހާ ކޮއްކޮއިން ރަށުގާ ތިބީ. މުޅި އާއިލާ އެކީގަ އޮތް. އަޅުގަނޑު ހިތުން ކޮޅުފުއްޓަށް އެދުވަހު ވެގެންދިޔަ ގޮތް އެއީ އަދި އަޅުގަނޑު މި ދުއް މަންޒަރަށްވުރެން މާ ހިތާމަވެރި، މާ ބިރުވެރި، މާ ދަތި ދުވަހެއް،" ކުރެކިފައިވާ އަޑުފުޅަކުން ވާހަކަ ދައްކަވަމުން ރައީސް ވިދާޅުވިއެވެ.

މިއަހަރުގެ އެއްބައިވަންތަކަމުގެ ދުވަހުގެ މުނާސަބަތުގައި، ކޮޅުފުށީގައި ބާއްވާ ރަސްމީ ޖަލްސާގައި ބައިވެރިވުުގެ އިތުރުން، ރައީސުލްޖުމްހޫރިއްޔާގެ މިދަތުރުފުޅުގައި، ސުނާމީ ކާރިސާގައި ކޮޅުފުށިން ނިޔާވި މީހުންގެ ހަނދާނުގައި ހަދާފައިވާ ހަނދާނީ ބިނާ އިފްތިތާޙްކޮށްދެއްވާނެއެވެ. އަދި އެއްބައިވަންތަކަމުގެ ދުވަހުގެ އަތުގުޅާލުމުގައި ބައިވެރިވެވަޑައިގަންނަވާނެއެވެ.