ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޔާމީނުގެ މައްޗަށް ދައުވާކޮށްފައިވާ އާރަށް މައްސަލާގައި އިއްޔެ އެމަނުކުފާނުގެ މައްޗަށް ކޮށްފައިވާ ހުކުމާއި ގުޅޭ ލިޔެކިޔުންތައް އެތައް އިރެންވަންދެން ހަވާލުނުކޮށް ހިފެހެއްޓުމަށް ފަހު، މިއަދު މެންދުރުވެ ދިޔަފަހުން ހަވާލުކޮށްފިއެވެ. 

ހުކުމާއި ގުޅޭ ލިޔެކިޔުންތައް ލިބިފައިވާކަން ހާމަކުރައްވައި ރައީސް ޔާމީންގެ ވަކީލުންގެ ޓީމްގައި ހިމެނޭ ޝިޔާޒް، މެންދުރު 2:30 ވެ ދިޔަ ފަހުން ކުރެއްވި ޓުވީޓެއްގައި ވިދާޅުވީ "ހަމަދެންމެ ރިޕޯޓް ލިބިއްޖެ." ކަމަށެވެ.

ރައީސް ޔާމީނުގެ މައްޗަށް ދައުވާކޮށްފައިވާ އާރަށް މައްސަލާގައި ރިޝްވަތު ގަބޫލުކުރުމުގެ ކުށާއި، މަނީ ލޯންޑަރިންގެ ކުށް އެމަނިކުފާނުގެ މައްޗަށް ސާބިތުވާ ކަމަށް ކަނޑައަޅައި އެމަނިކުފާނުގެ މައްޗަށް އިއްވާފައިވާ 11 އަހަރުގެ ޖަލު ހުކުމް އިއްޔެ ވަނީ އިއްވާފައެވެ.  

ސުޕްރީމް ކޯޓުން މިދިޔަ އަހަރުގެ ޖަނަވަރީ 18 ވަނަ ދުވަހު ނެރުނު ޕްރެކްޓިސް ޑައިރެކްޝަންގައި ބުނެފައި އޮންނަނީ ކޮންމެ ކޯޓަކުންވެސް ބަލައި ނިންމާ މައްސަލައެއްގައި ހުކުމް އިއްވާ ދުވަހު، އެ މައްސަލައިގެ ހުކުމަށް ވާސިލުވި ސަބަބާއި ހުކުމް ހިމެނޭގޮށް ތައްޔާރުކޮށްފައިވާ "ޝަރީއަތް ނިމުނު ގޮތް" (ޖަޖްމެންޓް) ގެ އަސްލެއް އެ މައްސަލަ ބެލި ފަނޑިޔާރު ނުވަތަ ފަނޑިޔާރުންގެ ސޮޔާއެކު، އެމައްސަލައިގައި ހިމެނޭ ކޮންމެ ފަރާތަކަށްވެސް ހަވާލު ކުރަން ވާނެ ކަމަށެވެ.

އެހެންނަމަވެސް މިއަދު މެންދުރާއި ޖެހެންދެންވެސް ހުކުމް ހަވާލު ކޮށްފައި ނުވާއިރު، އެކަމާއި ގުޅިގެން ކަންބޮޑުވުން ފާޅުކޮށް ޔާމީންގެ ވަކީލުންގެ ޓީމްގައި ހިމެނޭ އަބްދުﷲ ޝިޔާޒް ދެންމެ ކުރެއްވި ޓްވީޓެއްގައި ވިދާޅުވީ ޙުކުމްގެ ކޮޕީ ލިބޭނެ ކަމަށް ފުރަތަމަ ބުނީ ޝަރީއަތް ނިމުމާ އެކު ކަމަށެވެ. ޙުކުމް ކޮށް ނިމުނީމާ ބުނީ ކުޑައިރުކޮޅެއް ތެރޭ ލިބޭނެކަމަށް ކަމަށާއި އިރުކޮޅެއް 30 މިނެޓަށްވުރެ ދިގުވެގެން ދިޔައީމަ ސުވާލުކުރީމާ ބުނީ އަދި ގަޑިއެއްހާ އިރު ވާނެ ކަމަށް ކަމަށެވެ.

"އެއްގަޑި ތިރީސް މިނެޓް ވީމާ ސުވާލު ކުރީމާ ބުނީ އެންމެ ލަސްވެގެން ރޭގަނޑު 10 ނުވަތަ 11 ޖަހާއިރު ލިބޭނެ ކަމަށް، އޭގެ ފަހުން ގުޅައިގެން ފޯނެއް ނުނަގާ، ހެނދުނު 8:30 ވީ އިރުވެސް ހުކުމްގެ ކޮޕީ ނުލިބޭތީ އާއި ފޯނަށް ޖަވާބު ނުދޭތީ ކޯޓަށް އައިސް ރިސެޕްޝަން މެދުވެރިކޮށް ސެކްޝަންއާ ސުވާލު ކުރުމުން ބުނީ 11 ޖެހުމުގެ ކުރިން ދޭނެ ކަމަށް، އެގާރަ ޖެހީމާ 11:45 ގައި ދޭނެ ކަމަށް، ކިތަންމެ އިރެއްވިޔަސް އަޅުގަނޑުމެން މިިތިބީ މި ޙުކުމްގެ ލިޔުން ހިފައިގެން ނޫނީ ކޯޓުން ބޭރަށް ނުދާގޮތަށް." ޝިޔާޒް ވިދާޅުވިއެވެ.