ވެމްކޯއިން ގޭބިސީތަކުން ނަގަން ޖެހޭ ކުނި މަގުމައްޗަށް ނެރުން ހުއްޓާލަން, ރަސްމީކޮށް ކައުންސިލުން މިއަދު އެދޭނެ ކަމަށާއިކުނި މެނޭޖު ކުރުމާބެހޭ ގާނޫނާއި ތިމާވެއްޓާބެހޭ ގާނޫނާއި އާންމު ސިއްހަތާ ބެހޭ ގާނޫނަށް ރިޢާޔަތްކޮށް ކައުންސިލުން ވެމްކޯއާ މެދު ހަރުކަށި ފިޔަވަޅު އަޅާނެ ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، މިއަދު ނޫސްވެރިންނާ ބައްދަލު ކުރައްވާ ދެއްކެވި ވާހަކަފުޅުގައެވެ.
"އަޅުގަނޑުމެން އެކަމުގައި އަޅަން ޖެހޭ ފިޔަވަޅުތައް ވެސް ހަމަ ހަރުކަށި ގޮތުގައި ވެމްކޯއާ ދޭތެރޭގައި އަޅާނަން،" މުއިއްޒު ވިދާޅުވިއެވެ.
މާލެއާއި ވިލިމާލޭގެ އާންމު ތަންތަނުން ކުނި ނެގުމަށް ކުރިން ވެމްކޯއާ ހަވާލުކޮށްގެން ކުރިއަށް ގެންދިޔަ މަސައްކަތުގެ އެގްރިމެންޓް ހަމަވުމާއެކު، މިހާރު ސިޓީ ކައުންސިލުން ވަނީ އެކަން ހުއްޓާލުމަށް ވެމްކޯއަށް އަންގާފައެވެ.
މާލެއާއި ވިލިމާލޭގެ އާންމު ސަރަހައްދުތަކުން ކުނި ނަގަން ވެމްކޯ އަށް ބޮޑު ބަޖެޓެއް ދިން ނަމަވެސް އެ ކުންފުނިން ގަވާއިދުން އެ ކަން ކުރަމުން ނުދާ ކަމަށް ބުނެ، ސިޓީ ކައުންސިލުން ނިންމާފައި ވަނީ ވެމްކޯއާއެކު ހެދި އެއްބަސްވުން އާ ނުކުރުމަށެވެ.
ސިޓީ ކައުންސިލުން އަމިއްލައަށް މާލެއާއި ވިލިމާލޭގެ ޕާކުތަކާއި މައިޒާންތަކާއި މަގުތައް ސާފުކުރުމަށް ނިންމާފައި ވާއިރު، މާލޭގެ އާންމު ތަންތަނުން ކުނި ނެގުމުގެ މަސައްކަތާ ވެސް ދެން ހަވާލު ވާނީ ސިޓީ ކައުންސިލުންނެވެ.
ވެމްކޯ އިން ދެން ހަމައެކަނި ނަގާނީ ގޭބިސީތަކުން ބޭރުކުރާ ކުނި އެކަންޏެވެ.
Advertisement
This content is created and paid for by advertisers and does not involve Voice Journalists
