ހ. ޝީރީން ވިލާގައި އަނިޔާވެރިގޮތަކަށް މަރާލާފައި އޮތްވާ ފެނުނު ޝިއާއު މުހައްމަދު ސައީދު (22 އަހަރު) ގެ މަރުގެ މައްސަލާގައި, އަލީ ސާހިލްގެ މައްޗަށް ފަސް ދައުވާއެއް ކުރުމަށް ޕްރޮސެކިއުޓާ ޖެނެރަލްގެ އޮފީހުގެ ފަރާތުން ކްރިމިނަލް ކޯޓަށް ހުށަހަޅައިފިއެވެ.

އޮގަސްޓު ހަ ވަނަ ދުވަހު، ތޫނުއެއްޗަކުން ޙަމަލާދީ ޝިއާއު މަރާލި މައްސަލައާ ގުޅޭގޮތުން ޕީޖީން މިއަދު ބުނީ،ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ފަސް ވަނަ މާއްދާގެ ދަށުން ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ އާއި އިތުރު 4 ދަޢުވާއާއެކު, އެކު ޖުމްލަ 5 ދަޢުވާ ކުރުމަށް ކޯޓަށް ހުށަހަޅާފައި ވާކަމަށެވެ. ނަމަވެސް ހަތަރު ދައުވާއެއްގެ ތަފްސީލެއް ޕީޖީން ނުދެއްވައެވެ. 

ދެންކުރާ 4 ދައުވާގެ ތަފްސީލް ޕީޖީން ހާމަކޮށްފައިނުވެއެވެ.

މި މައްސަލަ އާއި ގުޅިގެން އޮކްޓޯބަރ މަހުގެ 15 ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ޝިއާއުގެ މަރާއި ގުޅިގެން ތުހުމަތުކުރެވޭ އަލީ ޝާހިލްގެ މައްޗަށް ގަސްދުގައި މީހަކު މެރިކަމުގެ ކުށް ސާބިތުވާ ވަރަށް ހެކި ލިބިފައިވާކަމަށެވެ. އެހެން ނަމަވެސް މިހާތަނަށް އޭނާ މަރާލި ސަބަބު ނުވަތަ މޯޓިވް ކަށަވަރުކުރެވިފައި ނުވާކަމަށެވެ. 

ޝާހިލްގެ ފަރާތުން ފުލުހުންނަށް އެއްބާރުލުން ދިން ނަމަވެސް، ސީދާ އެ މައްސަލައިގައި އޭނާ އެކަށީގެންވާ މައުލޫމާތުތައް ހިއްސާކުރަމުން ނުދާކަމަށް ފުލުހުން ބުންޏެވެ.