ކުރިއަށް އޮތް ރިޔާސީ އިންތިހާބުގައި ވާދަކުރަން ނިންމެވީ، އެކުގައި ވާދަކުރައްވަނީ ކޮން ބޭފުޅަކުތޯ ބަލައިގެން ނޫން ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

މިއަދު ހަވީރު ރައީސް އޮފީހުގައި ނޫސްވެރިންނާ ބައްދަލު ކުރައްވައި ވާހަކަ ދައްކަވަމުން ރައީސް ވިދާޅުވީ، ރާއްޖޭގެ ސިޔާސީ މަޝްހަރު އޮތް ގޮތުން، ކޮންމެ މީހަކު ކުރިމަތިލިޔަސް އިންތިހާބު ވާދަވެރި ވާނެ ކަމަށެވެ.

"ރިޔާސީ އިންތިހާބަށް އަޅުގަނޑު ކުރިމަތިލާން މި ނިންމީއަކީ، ކޮންމެހެން އަޅުގަނޑާ ވާދަ ކުރަނީ ކާކުތޯ ބަލައިގެނެއް ނޫން. ކޮންމެ ބޭފުޅަކު ކުރިމަތިލެއްވިޔަސް، އަޅުގަނޑު ދެކޭގޮތުގަ ވާދަވެރި އިންތިހާބަކަށް ވާނެ. އެއީ ވަކި ބޭފުޅެއް ވެގެނެއް ނޫން،" ރައީސް ވިދާޅުވިއެވެ.

އެހެންކަމުން، އިންތިހާބުގައި ވާދަކުރަނީ ކޮން ބައެއްތޯއާއި ކޮން ޕާޓީތަކަކުންތޯ ނުބައްލަވާކަމަށް ރައީސް ވިދާޅުވިއެވެ.

"އެހެންވީމާ އެއީ ވަކި ބޭފުޅެއްތޯ، ވަކި ޕާޓީއެއްގެ ބޭފުޅެއްތޯ ބަލައިގެނެއް ނޫން އަޅުގަނޑު ކުރިއަށް ދާން މި ނިންމީއަކީ. އަޅުގަނޑަށް ޓިކެޓް އިރާދަކުރެއްވިއްޔާ ލިބުމާއެކީގަ އަޅުގަނޑުގެ މަސައްކަތް ފަށާނީ އިންތިހާބު ކާމިޔާބު ކުރުމަށް. އެއީ، އަޅުގަނޑުގެ ވާދަވެރި ކެނޑިޑޭޓަކީ ކާކުތޯ ކޮންމެހެން ބަލައިގެނެއް ނޫން އަޅުގަނޑު ކުރިއަށް ދާނީ،" ރައީސް ވިދާޅުވިއެވެ.

އަންނަ ޖަނަވަރީ މަހުގެ 28 ވަނަ ދުވަހުގައި އެމްޑީޕީގެ ރިޔާސި ކެނޑިޑޭޓު ކަނޑައެޅުމަށް ރިޔާސީ ޕްރައިމަރީ ބާއްވާނެކަން އެމްޑީޕީން މިމަހު 18 ވަނަ ދުވަހު އިއުލާން ކުރުމާއިއެކު، ރައީސް ނަޝީދު ވަނީ އެމަނިކުފާނު ޕްރައިމަރީގައި ވާދަކުރައްވާނެކަން ޔަގީންކޮށްދެއްވާފައެވެ. އަދި އެކަމުގައި އެމަނިކުފާނަށް ތާއީދު ކުރެއްވުމަށް އެމްޑީޕީގެ އެންމެހައި މެމްބަރުންގެ ކިބައިން ވަނީ އެދިވަޑައިގެންފައެވެ. އަދި ރައީސް ޞާލިހު ވަނީ20 ހާސް ތާއީދު ސޮޔާއެކު ކެޑިޑެންސީ ފޯމު ހުށަހަޅައިފައެވެ.