ޖަނަވަރީ 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީ ބޮޑުތަނުން ކާމިޔާބު ކުރެވޭނެ ކަމުގެ ޔަގީންކަން އެބައޮތް ކަމަށާ، އެއަށްފަހު، ކޯލިޝަންގެ ތާއީދު ހޯއްދެވުމުގެ މަސައްކަތް ފައްޓަވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އަންނަ ރިޔާސީ އިންތިހާބަށް ރައީސް ޞާލިހު ވާދަކުރައްވާއިރު، ހުންނަވާނީ މިހާރުގެވެސް ކޯލިޝަން އާއި އެކީގައިތޯ ކުރި ސުވާލަށް ޖަވާބ  ދެއްވަމުން ވިދާޅުވީ، ރިޔާސީ އިންތިހާބުގައި ކޯލިޝަންގެ ބައިވެރިންނަަށް ހަދާ ޕާޓީތައް ކަނޑައެޅުމުގެ ކުރިން، ޔަގީން ކުރަން ޖެހޭނީ އެ އިންތިހާބުގައި އެ މަނިކުފާނު ވާދަކުރައްވާނެތޯ ނުވަތަ ނޫންތޯ ކަމަށެވެ.

އެގޮތުން، އެކަން ޔަގީން ކުރުމަށް އަންނަ ޖަނަވަރީ މަހުގައި ބާއްވާ ޕްރައިމަރީ ބޮޑުތަނުން ކާމިޔާބު ކުރައްވާނެކަމުގެ ޔަގީންކަން އެބައޮތް ކަމަށާ، ޕާޓީގެ ޓިކެޓު ހޯއްދެވުމަށް ފަހު އިތުރު ޕާޓީތަކާ ކޯލިޝަން ހެދުމަށް މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.

Advertisement

"އިރާދަކުރެއްވިޔާ ޕްރައިމަރީ އަޅުގަނޑު ބޮޑު ތަނުން ކާމިޔާބު ކުރާނަން. އެއަށްފަހުގައި އަޅުގަނޑު ކޯލިޝަން އެއް އުފެއްދުމުގެ މަސައްކަތް ފަށާނަން. އަޅުގަނޑަށް ގަބޫލުކުރެވެނީ އަޅުގަނޑުމެންގެ ސިޔާސަތުތައް ތަންފީޒުކުރަމުން މި ދާގޮތަށް ބަލާފައި، ކޯލިޝަންގައި ހިމެނިވަޑައިގަންނަވާ ބޭފުޅުންގެ ތާއީދު އަޅުގަނޑަށް ލިބޭނެ ކަމަަށް. އަދި އެކަމު އެ މަޝްވަރާއެއް އަޅުގަނޑު ނުކުރަން. ނުރަސްމީކޮށް ވާހަކަ ދެކެވިފައި ހުންނާނެ. އެ ވާހަކައިގެ ތެރޭގައި އަޅުގަނޑުމެންނަށް ޚިޔާލު އެއްގޮތްވޭ ގިނަ ކަންތައް ތަކުގައި. އެހެންވީމާ އެ ޔަގީންކަން އަޅުގަނޑަށް ވަރަށް ބޮޑަށް އެބައޮތް" ރައީސް ޞާލިހު ވިދާޅުވިއެވެ.

ޕާޓީތަކާއި އެކު ކޯލިޝަން ހެއްދެވުމުގެ އިތުރުން، ވަކިވަކި ސިޔާސީ ފަރާތްތަކާއި ވާހަކަ ދައްކަވައިގެން އެފަރާތްތަކުގެ ތާއީދު ހޯއްދެވުމުގެ މަސައްކަތް ވެސް އެމަނިކުފާނު ކުރައްވާނެ ކަމަށާ އެ ފަރާތްތަކުގެ ތާއީދުވެސް ލިބޭނެ ކަމުގެ ޔަގީންކަން އެބައޮތް ކަމަށް ރައީސް ޞާލިހު ވިދާޅުވިއެވެ.