އެމްޑީޕީ އެއްކޮށް އޮވެއްޖެނަމަ، ކުރިއަށް އޮތް ރިޔާސީ އިންތިހާބު ކާމިޔާބުކުރަން ވަރަށް ބޮޑުތަން ފަސޭހަވާނެ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

މިއަދު ރައީސް އޮފީހުގައި ކުރިއަށްދިޔަ ޕްރެސް ކޮންފަރެންސްގައި ނޫސްވެރިން ކުރި ސުވާލުތަކަށް ޖަވާބު ދެއްވަމުން ރައީސް ޞާލިހު ވިދާޅުވީ، އެމްޑީޕީ ބައިބައިވެ ދެފަޅި ވެގެން ގޮސްފިނަމަ އެއީ ރިޔާސީ އިންތިހާބު ކާމިޔާބު ކުރުމަށް ކުރިމަތިވާނެ 'ޗެލެންޖެއް' ކަމަށެވެ.

"އަޅުގަނޑުގެ އިލްތިމާސްއަކީ މި ޕްރައިމަރީ ކުރިއަށް ދާއިރުގަވެސް ދެފަރާތުންވެސް މަސައްކަތް ކުރެއްވުން. ޕްރައިމަރީ ނިމުމާއެކީގަ މީ އެކީގަ މަސައްކަތް ކުރަންޖެހޭ ބައެއްކަން ދެނެގަނެ، އެގޮތަށް ކުރިއަށް ދިއުން،" ރައީސް ވިދާޅުވިއެވެ.

އެމްޑީޕީގެ ކޮންމެ މެމްބަރަކުވެސް، އެމީހަކު ތާއީދުކުރާ ކެނޑިޑޭޓަކަށް ވޯޓުލުން ޕްރައިމަރީއެއްގައި އޮންނާނެ ކަމަށާއި އެހެން ނަމަވެސް ޕްރައިމަރީ ނިމުމަށްފަހު، ރިޔާސީ އިންތިހާބު ކާމިޔާބު ކުރުމަށްޓަކާ ކުރަންޖެހޭ ކަންކަން ކުރުމުގައި، އެންމެން އެކީގައި ތިބުމަކީ މުހިންމު ކަމެއް ކަމަށް ރައީސް ވިދާޅުވިއެވެ.

މީގެ އިތުރުން އެމްޑީޕީގެ ޕްރައިމަރީއަސް ދާއިރު، ރިޔާސީ އިންތިހާބު ކާމިޔާބު ކުރެވޭނެ މީހަކާ އެކީީގައި ކުރިއަށް ދިއުމަށް ރައީސް ވަނީ އެމްޑީޕީގެ މެމްބަރުންނަށް އިލްތިމާސް ކޮށްފައެވެ.

އަންނަ މަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަމަށް އިއުލާނު ކޮށްފައި ވަނީ، ރައީސް ޞާލިހާއި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ.