އަދުގެ ސަރުކާރު ހިންގާ މައި ޕާޓީ، އެމްޑީޕީ އަކީ އެއް އިރެއްގައިވެސް ރިއެކްޓް ކުރާ ޕާޓީއެއް ނޫންކަމަށާއި، އެއީ އަބަދުވެސް ހަކުޅި ކުރިއަށް ކުޅޭ ޕާޓީއެއް ކަމަށް ވިދާޅުވެ، ޑިފެންސް މިނިސްޓަރު މާރިޔާ އަހްމަދު ދީދީ، ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ރައްދު ދެއްވައިފިއެވެ. 

އެމްޑީޕީގެ ރިޔާސީ ޕްރައިމަރީ އަށް ނަޝީދުގެ ކެމްޕެއިން، "ފިކުރެއްގެ ދިރުން" ލޯންޗުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން، ސަރުކާރު ހިންގުމުގެ ތެރޭގަ އާއި އެމްޑީޕީގެ މެނިފެސްޓޯ ތަންފީޒު ކުރުމުގައި ރައީސް އިބްރާހިމް މުހައްމަދު ޞާލިހު، "ރިއެކްޓް" ނުކުރައްވާ ކަމަށް ވިދާޅުވެ ނަޝީދު ވަނީ އެމަނިކުފާނަށް ވަރަށް ބޮޑަށް ފާޑުވިދާޅުވެފައެވެ. 

"ނުވި، ނުވި. ނުވި. ރިއެކްޓެއް ނުކުރެއްވި. ވެށިފަށި މާލެ ޕްރޮގްރާމަށް ވެސް އެއްވެސް ރިއެކްޝަނެއް ނެތް. އެއްދަންފަޅީގެ މަދަރުސާއަކަށް ވެސް ނެތޭ ރިއެކްޝަނެއް. އައްޑޫ ސިޓީއާ ބޮޑެތި ރަށްތަކުގެ އިގުތިސޯދު ވަށައިގެންވާ އެހެން ރަށްތަކާ އަދި ތިނަދޫގެ ބޮޑު އިގުތިސޯދު، ބޮޑު އިގުތިސޯދު. ހުވަދު އަތޮޅުގެ އެތައް ރަށެއްގެ، ކިތައްމެ ރަށެއް މިހާރު އެބަހުރި 4،000 މީހުންނަށް ދާ. މިއީ އެކަށީގެންވާ ރަނގަޅު ވިކުރާއެއް ނުކުންނާނެ ވިޔަފާރި ކުރެވޭނެ ރަށްރަށް،" 

"ރައީސް ސޯލިހު އެތައް ތަގުރީރެއްގައި، ކިތައްމެ އިންޓަވިއުއެއްގައި ސާފު ސަރީހަ އިބާރާތުން ވިދާޅުވަމުން ގެންދެވި ވާހަކަ. ނަމަވެސް ވެރިކަމަށް ވަޑައިގެންފައި ރިއެކްޓެއް ނުކުރެއްވި." ރޭގެ ޖަލްސާގައި ވާހަކަ ދައްކަވަމުން ރައީސް ސާލިހަށް ފާޑުވިދާޅުވެ ނަޝީދު ވިދާޅުވި އެވެ. 

ނަޝީދުގެ މި ވާހަކަތަކަށް ރައްދު ދެއްވަމުން، މިހާރު ކުރިއަށްދާ، ރައީސް ޞާލިހުގެ ކެންޕެއިން ޖަގަހަ ޖަލްސާގައި ވާހަކަ ދައްކަވަމުން މާރިޔާ ވިދާޅުވީ، ރިއެކްޓް ކުރުމުގެ ވާހަކަ ރައީސް ނަޝީދު ދެއްކެވުމުން ވަރަށް ބޮޑަށް ހައިރާންވެވަޑައިގަންނަވާ ކަމަށާ، އެއީ އެމްޑީޕީގެ ވިސްނުމާއި ވަރަށް ދުރު ކަމެއް ކަމަށެވެ. 

"އަޅުގަނޑު ވަރަށް ހައިރާންވޭ، މި ޕާޓީގެ ރައީސް ރިއެކްޓް ނުކުރައްވާ ވާހަކަ ވިދާޅުވީމަ. މި ޕާޓީއަކީ އެއްވެސް އިރެއްގައި ރިއެކްޓް ކުރާ ޕާޓީއެއް ނޫން. މި ޕާޓީއަކީ ޕްރޯއެކްޓިވް ޕާޓީއެއް. މިއީ އަބަދުވެސް ހަކުޅި ކުރިއަށް ކުޅޭ ޕާޓީއެއް. ތިބޭފުޅުން ހަނދުމަފުޅު ހުންނާނެ އަޅުގަނޑުމެންނަކީ ބައެއްގެ ފަހަތުން، ބަޔަކު ކުރާ ކަމަކަށް ބަލަމުންދާ ބައެއް ނޫން. ހަކުޅި ކުރިއަށް ކުޅޭ ވާހަކަ ދައްކަމުން މި ހިސާބަށް އައިސްފައި، ކުއްލި އަކަށް ރިއެކްޓް ގެ ވާހަކަ ދެއްކީމާ އަޅުގަނޑު ވަރަށް ދެރަވޭ. ޕާޓީގެ ވިސްނުމާއި ވަރަށް ބީރަށްޓެހި ވިސްނުމެއް އެއީ ރިއެކްޓް ކުރުމުގެ ވާހަކަ." މާރިޔާ ވިދާޅުވިއެވެ.