ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން ނިންމި ކަމަށް ބުނާ 47 ބަނދަރު ތަކުގެ ތެރެއިން 26 ބަނދަރަގެ މަސައްކަތަކީ ކުރީގެ ރައީސް، ރައީސް ޔާމީން އަބްދުލްގައްޔޫމް ގެ ވެރިކަމުގައި ފެށިފައިވާ މަސައްކަތް ކަމަށް މާލެސިޓީ ކައުންސިލްގެ ރައީސް އަދި ކުރީގެ ހައުސިންގ މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ. 

މިދައުުރުގައި 47 ބަނދަރުގެ މަސައްކަތް ނިމި 36 ބަނދަރު ހެދެމުންދާ ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ މެންބަރު ޢަލީ ނިޔާޒު ވިދާޅުވުމާއި ގުޅިގެން އެއަށް ރައްދު ދެއްވައި މުޢިއްޒު ކުރެއްވި ޓްވީޓެއްގައި ވިދާޅުވީ، ރައީސް ޔާމީން އެމަނިކުފާނުގެ ވެރިކަމުގައި 108 ބަނދަރުގެ މަސައްކަތް ނިންމެވިކަމަށެވެ. 

އަދި އެ މަނިކުފާނުގެ ވެރިކަން ނިމުނުއިރު 26 ބަނދަރުގެ މަސައްކަތް ކުރިއަށް ދިޔަ ކަމަށްވެސް އޭނާ ވިދާޅުވި އެވެ. 

Advertisement

"މި ވެރިކަމުގައި ނިންމި ކަމަށް ބުނާ 47 ބަނދަރުގެ ތެރެއިން 26 ބަނދަރަކީ ރައީސް ޔާމީންގެ ވެރިކަމުގައި ފެށިފައިވާ ބަނދަރުތައް." ޑރ. މުއިއްޒު ވިދާޅުވި އެވެ. 

ރައީސް ޞާލިހުގެ މި ވެރިކަމުގައި އެންމެ އަޑު ހަރުކޮށް އެމަނިކުފާނުގެ ސަޕޯޓަރުން ދައްކާ ވާހަކަ އަކީ މި ސަރުކާރުން ހަދާ ބަނދަރު ތަކާއި، ފެނާއި ނަރުދަމާގެ ވާހަކަތަކެވެ. އަދި އެއީ މިސަރުކާރުން ކުރި ތަރައްގީގެ އެންމެ ބޮޑު މަޝްރޫއު ގޮތަށް ސިފަވާ ގޮތަށްވެސް އެ ފަރާތްތަކުން އަންނަނީ ވާހަކަ ދައްކަމުންނެވެ. 

އެހެން ނަމަވެސް ރައީސް ޔާމީންގެ ވެރިކަމުގައި، ތަރައްގީގެ އިތުރު ބިޔަ މަޝްރޫއުތައް ހިންގަމުންވެސް އެކަންކަން ކޮށްދެއްވާފައިވާ ކަމަށް ވިދާޅުވެ ޔާމީންގެ ސަޕޯޓަރުން އަންނަނީ މި ސަރުކާރުގެ ދައުރު ހަމަވާއިރުވެސް ތަރައްގީގެ 'ބިޔަ' މަޝްރޫއު އެއް ނުހިންގޭ ކަމަށް ބުނަމުންނެވެ.