ގޮންޖެހުންތަކާއެކުވެސް ފާއިތުވެގެންދިޔަ އަހަރުގެ ތެރޭގައި ދިވެހިރާއްޖެއިން ހާސިލުކޮށްފައިވާ ލަނޑުދަނޑިތަކާއިމެދު ފަހުރުވެރި ވެވަޑައިގަންނަވާކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހާއި އެމަނިކުފާނުގެ އަނބިކަނބަލުން ފަޒްނާ އަހުމަދު ގެ ފަރާތްޕުޅުން އައު އަހަރުގެ ތަހުނިޔާ ދިވެހި ރައްޔިތުންނަށް ފޮނުއްވައި ކުރެއްވި ޓްވީޓްގައި އެމަނިކުފާނު ވަނީ ބޮޑެތި ގޮންޖެހުންތަކަކާއި ކުރިމަތިލުމަށްފަހު، ފާއިތުވެދިޔަ އަހަރުގައި ދިވެހިރާއްޖެއަށް ފަހުރުވެރިވާފަދަ ކަންކަން ހާސިލު ކުރެވިފައިވާކަމަށް ވިދާޅުވެފައެވެ.
އަދި ކުރިއަށް އޮތް އަހަރުގެ ތެރޭގައިވެސް އިތުރު ކަންކަން ފެނި، ހާސިލު ކުރެވިގެންދާނެކަމަށް އުންމީދު ކުރައްވާކަމަށް އެމަނިކުފާނު ވަނީ ވިދާޅުވެފައެެވެ.
މި ފެށުނު އައު އަހަރު ފެށިގެން ގޮސްފައި މިވަނީ، ރައްޔިތުންގެ އަތުން ނަގާ ޖީއެސްޓީއާއި ޓީޖީއެސްޓީ ވެސް ބޮޑު ކުރެވި ތަކެތީގެ އަގުތަށް އިންތިހާއަށް ބޮޑުވުމާއި އެކުގައެވެ.
އަދި ހަމަ އެހެންމެ، މި 2023 ވަނަ އަހަރަކީ، ރާއްޖޭގެ ރިޔާސީ އިންތިހާބުވެސް ބޭއްވުމަށް ހަމަޖެހިފައިވާ އަހަރެވެ. މިއިންތިހާބުގައި ވާދަ ކުރައްވާނެކަން އިއުލާން ކުރައްވާފައިވާ އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް 11 އަހަރަށް ޖަލަށް ލާން ހުކުމް ކޮށްފައިވާ އިރު، އެމްޑީޕީގެ ފަރާތުން ވާދަކުރައްވާ ކެންޑިޑޭޓެއް ޔަގީން ވެގެން ދާނީ މިމަހު 28 ވަނަ ދުވަހު އޮންނަ ރިޔާސީ ޕްރައިމަރީއަށް ފަހުގައެވެ.
Advertisement
This content is created and paid for by advertisers and does not involve Voice Journalists
