ވިލިމާލެ އިން ތެޔޮ ބޯއްޓެއްގައި ފުރި ފަހުން ގެއްލުނު ދެމީހުން ދަތުރުކުރި ތެޔޮބޯޓު، އޮޔާދަނިކޮށް ފެނުނު ކަމަށް ފުލުހުން ބުނެފިއެވެ.
ޑިސެމްބަރ 28 ވަނަ ދުވަހުގެ ރޭ ވިލިމާލެއިން ތެޔޮ ބޯޓެއްގައިފުރި ދެ މީހެއްގެ ޚަބަރެއް ނުވެގެން އެމީހުން ހޯދުމުގެ މަސައްކަތް ކުރަމުންދާކަމަށް ފުލުހުން ވަނީ މިއަދު ބުނެފައެވެ.
އަދި ގެއްލިގެން ހޯދަމުންދަނީ، ގދ. ތިނަދޫ / މަނާރު، މުޙައްމަދު ނިޡާމް (45އ) އަދި ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ) ކަމަށާ އެ ދެ މީހުންގެ ޚަބަރެއް ނުވެގެން ފުލުހުންނަށް ރިޕޯޓުކޮށްފައިވަނީ ޑިސެމްބަރު 29 ވަނަ ދުވަހުގެ ވަގުތެއްގައި ކަމަށްވެސް ބުނެފައިވެއެވެ.
މި ހާދިސާއާއި ގުޅޭ އިތުރު މައުލޫމާތު ހިއްސާ ކުރަމުން ފުލުހުން ކުރި ޓުވީޓެއްގައި ބުނީ، އެ ދެ މީހުން ދަތުރުކުރި ތެޔޮބޯޓު، އެއާޕޯޓު ނެރުކައިރިން އޮޔާދަނިކޮށް ޑިސެމްބަރ 29 ވަނަ ދުވަހު ފެނިފައިވާ ކަމަށެވެ. އަދި އޮޔާ ދަނިކޮށް ފެނުނު ބޯޓުން ދަތުރުކުރީ އެ ދެ މީހުން ކަމަށްވެސް ފުލުހުންނަށް މައުލޫމާތު ލިބިފައިވާ ކަމަށް ބުނެފައިވެއެވެ.
ނަމަވެސް އެ ދެމީހުން އަދިވެސް ނުފެންނަ ކަމަށް ފުލުހުން ބުނެއެވެ.
މުޙައްމަދު ނިޡާމް އަދި މޮހައްމަދު ލިޓަންއާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ 9911099 އަށް ގުޅުއްވައި ހިއްސާކުރެއްވުމަށް ފުލުހުން ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
