ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިގްތިސާދީ ކަންކަން ނިންމަވަނީ ލިބިވަޑައިގަންނަވާނެ ސިޔާސީ މަންފާއަށް ވިސްނަވާފައި ނޫންކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ. 

އަމީރު އެފަދައިން ވިދާޅުވެފައިވަނީ ރައީސް ސޯލިހުގެ އިގްތިސާދީ ސިޔާސަތަށް ތައުރީފުކުރައްވާ ކުރެއްވި ޓްވީޓެއްގައެވެ. 

ރައީސް އިބްރާހިމް މުހައްމަދު ސޯލިހުގެ އިގްތިސާދީ ސިޔާސަތުގެ ސަބަބުން ދިވެހިރާއްޖޭގެ އިގްތިސާދު ކޯވިޑްގެ ކުރީގެ ހާލަތަށް ރުޖޫއަ ކުރެވިފައިވާކަން ފާހަގަކުރައްވާ ކުރެއްވި ޓްވީޓެއްގައި އަމީރު ވިދާޅުވީ އައިއެމްއެފް ގެ ސްޓާފް ވިޒިޓަށް ފަހު ނެރެފައިވާ ޕްރެސް ރިލީޒްގައި ފާހަގަކޮށްފައިވާ ގޮތަށް ރާއްޖޭގެ އިގުތިސާދު ދަނީ ބާރަށް ކުރިއަރަމުންކަމަށެވެ. 

Advertisement

އިގްތިސާދީ ދަތި ހާލަތުން ގައުމު ސަލާމަތް ކުރުމަށް ރައީސް ސޯލިހު ކަންކަން ނިންމަވަނީ އެމަނިކުފާނަށް ލިބިވަޑައިގަންނަވާނެ ސިޔާސީ މަންފާއަށް ބެއްލެވުމެއްނެތި ކަމަށް އަމީރު ވިދާޅުވިއެވެ. 

އެވިދާޅުވާ ނިންމެވުމަކީ ރިޔާސީ އިންތިޚާބުގެ އަހަރާއި ދިމާކޮށް ޖީއެސްޓިއާއި ޓީޖީއެސްޓީ ބޮޑުކުރުންކަމަށް ބެލެވެއެވެ. އެއީ ކުރިމަތީގައި ރިޔާސީ އިންތިޚާބު އޮއްވާ ޓެކްސް ބޮޑުކުރުމަކީ ސިޔާސީ ބޭނުމަކަށް ސިޔާސީ ލީޑަރަކު ކުރައްވާނެކަމެއް ނޫންކަމަށް މީގެ ކުރިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުވެސް ވަނީ ވިދާޅުވެފައެވެ. 

އަމީރު ވިދާޅުވީ އަވައްޓެރި ގައުމުތަކުން އިގްތިސާދީ ކަންކަން ސިޔާސީ ކުރުމުން ނިކުތް ނަތީޖާ ފެނިފައިވާކަމަށެވެ. 

އެހެން ނަމަވެސް ރައީސް ސޯލިހަކީ ސިޔާސީ މަންފާއެއް ހާސިލްކުރެއްވުމަށް އެފަދަ ނިންމެވުމެއް ނިންމަވާނެ ފަރާތެއް ނޫންކަމަށް އަމީރު ވަނީ ވިދާޅުވެފައެވެ. 

އެމަނިކުފާނު އަބަދުވެސް އިސްކުރައްވަނީ ގައުމާއި ރައްޔިތުންކަމަށް އަމީރު ވަނީ ވިދާޅުވެފައެވެ.