ވިލިމާލެއިން ތެޔޮ ބޯޓެއްގައިފުރި ފަހުން ގެއްލިގެން ފުލުހުންނަށް ރިޕޯޓް ކުރި، ގދ. ތިނަދޫ / މަނާރު، މުޙައްމަދު ނިޡާމް (45އ) މިއަދު ހޯދައި އޭނާ ހައްޔަރު ކޮށްފައިވާ ކަމަށް ފުލުހުން ބުނެފިއެވެ. 

ތެޔޮ ބޯޓުން ފުރި ފަހުން ޚަބަރެއް ނުވެގެން، ގެއްލިގެން ހޯދަމުންދިޔައީ މުޙައްމަދު ނިޡާމްގެ އިތުރުން ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ) އެވެ.

އެ ދެ މީހުން ވިލިމާލެ އިން ފުރާފައިވަނީ ޑިސެމްބަރ 28 ވަނަ ދުވަހުގެ ރޭ ގައި ކަމަށް ފުލުހުން ބުނެފައިވާއިރު އެ މީހުންގެ ޚަބަރެއް ނުވެގެން ފުލުހުންނަށް ރިޕޯޓުކޮށްފައިވަނީ ޑިސެމްބަރު 29 ވަނަ ދުވަހުގެ ވަގުތެއްގައި ކަމަށްވެސް މީގެ ކުރިން ފުލުހުން ބުނެފައިވެއެވެ.

Advertisement

އޭގެތެރެއިން، މުޙައްމަދު ނިޡާމް މިއަދު މާލޭގައި ހުންނަ ގެސްޓް ހައުސް އަކުން ފެނިފައިވާއިރު، ކޯޓު އަމުރެއްގެ ދަށުން އޭނާ މިއަދު ހައްޔަރު ކޮށްފައިވާ ކަމަށް ފުލުހުން ދާދި ދެންމެ އަކު ވަނީ ބުނެފައެވެ. 

އަދި އޭނާ ހައްޔަރު ކޮށްފައިވަނީ، އޭނާގެ މައްޗަށް ތުހުމަތު ކުރެވޭ މަރުގެ މައްސަލަ އަކާއި ގުޅިގެން ކަމަށްވެސް ފުލުހުން ބުނެފައިވެއެވެ. 

އެ ބޯޓުން ގެއްލުނު މުހައްމަދު ނިޒާމް މަރުގެ މައްސަލައެއްގެ ތުހުމަތުގައި ފުލުހުން ހައްޔަރު ކޮށްފައިވާއިރު، އެ ބޯޓުން ގެއްލުނު ބިދޭސީ މީހާ ފެނުނު ކަމެއް ނުވަތަ ނުފެންނަ ކަމެއްވެސް ފުލުހުން ހާމަކޮށްފައެއް ނުވެއެވެ. އަދި ނިޒާމް ހައްޔަރު ކުރީ ބިދޭސީ މީހާގެ މަރުގެ މައްސަލައަކާއި ގުޅިގެން ކަމެއްވެސް ފުލުހުން ހާމަކޮށްފައެއް ނުވެއެވެ.