ދިވެހިރާއްޖޭގެ އިގްތިސާދާއި މާލީ ހާލަތު ވަޒަންކޮށް އައި.އެމް.އެފް އިން ހެދި ރިޕޯޓުގެ ކޮޕީއެއް ހޯއްދެވުމަށް މަޖިލީހުގެ ނައިބު ރައީސާ އަދި މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އެދިވަޑައިގެންފިއެވެ.
އީވާ ވަނީ އެ ރިޕޯޓު ހޯއްދެވުމަށް ފިނޭންސް މިނިސްޓްރީއަށް ސިޓީއެއް ފޮނުއްވާފައެވެ.
އެ ސިޓީގައި އީވާ ވިދާޅުވީ އައިއެމްއެފް އިން ނެރުނު ނޫސް ބަޔާނުން، އެ ފަންޑުގެ ފަންނީ މުވައްޒަފުންގެ ޓީމެއް ރާއްޖެއަށް ޒިޔާރަތްކޮށް ރާއްޖޭގެ އިގުތިސޯދީ ކުރިއެރުމާއި ދައުލަތުގެ މާލީ މައުލޫމާތު ހޯދައި ރާއްޖޭގެ ކަމާބެހޭ ފަރާތްތަކާ މަޝްވަރާކުރުމަށްފަހު ރިޕޯޓެއް އެކުލަވާލާފައިވާކަން ބަޔާންކޮށްފައިވާކަމަށެވެ.
އެ ރިޕޯޓު އައިއެމްއެފްގެ އެގްޒެކެޓިވް ބޯޑުން އެސެސްކޮށްފައިވީއިރު، ދައުލަތުގެ ދަރަނީގެ މިންވަރު ކަންބޮޑުވާ މިންވަރަށް އިތުރުވެފައިވާކަން ފާހަގަކޮށް "ސަސްޓެއިންޑް ފިސްކަލް ކޮންސޮލިޑޭޝަން" އަކީ "ޓޮޕް ޕްރިއޮރިޓީ"ގެ ގޮތުގައި ފާހަގަކޮށްފައިވާކަމަށް އީވާ ވިދާޅުވި އެވެ.
އައިއެމްއެފްގެ އެ ރިޕޯޓު އާންމު ކުރުމަށް ނިންމާފައިވަނީ ސަރުކާރުގެ ރުހުމާއެކުގައެވެ. އީވާގެ ސިޓީގައި ވިދާޅުވީ 2020 ވަނަ އަހަރުގެ ފަހުން އައިއެމްއެފްގެ އާޓިކަލް IV ގެ ދަށުން ރާއްޖެއާ ގުޅޭގޮތުން އެކުލަވާލާ ރިޕޯޓުތައް އާއްމުކޮށްފައިނުވާ ކަމަށެވެ.
އެހެންކަމުން އެ ރިޕޯޓުގެ ކޮޕީއެއް ފޯރުކޮށްދެއްވުމަށް އީވާ ވަނީ އެދިވަޑައިގެންފަ އެވެ.
އައިއެމްއެފް ގެ ރިޕޯޓު ހޯއްދެވުމަށް އީވާ އެދިވަޑައިގެންފައި ވަނީ، ރާއްޖޭގެ އިގްތިސާދު ކުރިއަރަމުންދާކަމަށް އައިއެމްއެފްގެ ރިޕޯޓުގައި ބަޔާންކުރައްވާފައިވާ ފިނޭންސް މިނިސްޓަރު އިބްރާހިމް އަމީރު ވިދާޅުވެފައިވާ ދަނޑިވަޅެއްގަ އެވެ.
ކޯވިޑްގެ ކުރީގެ ހާލަތައް ރާއްޖޭގެ އިގްތިސާދު ކުރިއަރާފައިވާކަމަށާއި، ރާއްޖޭގެ އިގްތިސާދު ކުރިއަރައިގެން ދިޔައީ ރައީސް ސޯލިހު ހިކުމަތްތެރިކަމާއެކު އެޅުއްވި ފިޔަވަޅުތަކުގެ ސަބަބުންކަމަށް ފިނޭންސް މިނިސްޓަރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
