މާލޭ ރަސްމީ ފާލަމާ ދިމާ ފަޅުތެރެއަށް ކަޅުތެޔޮ އެޅެން ދިމާވި ސަބަބު އަދި ދެނެގަނެވިފައި ނުވާކަމަށް އެންވަޔަރުމަންޓު ޕްރޮޓެކްޝަން އޮތޯރިޓީ (އީޕީއޭ) އިން ބުނެފިއެވެ.
މާލޭ ރަސްމީ ފާލަމާ ތިން ނަންބަރު ޖެޓީ އާ ދިމާ ފަޅުތެރެއަށް "ކަޅު ތެޔޮ" އެޅިފައި ހުރިކަމުގެ މައުލޫމާތު ލިބުމާ ގުޅިގެން އެތަން ސާފުކުރުމުގެ މަސައްކަތް އެމްއެންޑިއެފްއިން ވަނީ ކޮށްފައެވެ. އެގޮތުން 700 މިލިލިޓަރުގެ ތަޅުތެޔޮ ނަގާ ސާފުކޮށްފައިވާކަން އެމްއެންޑީއެފްއިން ވަނީ ހާމަކޮށްފައެވެ.
އެމްއެންޑީއެފްއިން ބުނީ އެ ސަރަހައްދަށް 1000 ލިޓަރުގެ ތެޔޮ އެޅިފައި ހުރިކަމަށެވެ.
އެކަން ހިނގައިދިޔަގޮތް ތަހުގީގު ކުރުމުގެ މަސައްކަތް ފަށާފައިވާކަމަށް އީޕީއޭއިން ވަނީ ބުނެފައެވެ.
އެކަމާއި ގުޅޭގޮތުން އީޕީއޭގެ ޑިރެކްޓަރު އިބްރާހިމް ނައީމު ވިދާޅުވީ ތެޔޮ އެޅެން ދިމާވި ސަބަބު މިހާތަނަށް ދެނެގަނެވިފައި ނުވާކަމަށެވެ. އެހެން ނަމަވެސް އެކަން ބަލަމުންދާކަމަށް އޭނާ ވިދާޅުވިއެވެ.
އޭގެ އިތުރުން ނައީމު ވިދާޅުވީ ފަޅުތެރެއަށް ތެޔޮ އެޅުމާއި ގުޅިގެން އެ ސަރަހައްދުގައި އެއްވެސް ދިރުމަކަށް ގެއްލުމެއް ލިބިފައިވާކަން އަދި ފާހަގަކުރެވިފައި ނުވާކަމަށެވެ.
"މިވަގުތު ހުރީ ޝައްކުތަކެއް. ސީދާ ކަން ހިނގި ގޮތް ބަލަމުން މިދަނީ. އަޅުގަނޑުމެންނަށް ބޮޑަށް ބެލެވެނީ އެއީ ކަޅުތެޔޮ ނޫން ކަމަށް. އެއީ ހެވީ ފިޔުލް އޮއިލް ކަމަށް"
ދައުރު ނޫހަށް ދެއްވި އިންޓަރވިއުއެއްގައި ނައީމު ވިދާޅުވި
ހެވީ ފިއުލް އޮއިލްއަކީ އާގު ބޯޓް ފަހަރު ފަދަ ބޮޑެތި ބޯޓްތަކުގައި ބޭނުންކުރާ ތެލުގެ ބާވަތެކެވެ.އީޕީއޭއިން ބުނީ، އެކަން ހިނގައިދިޔަ ގޮތް ބަލަމުންދާކަމަށާއި، އެއްވެސް ގެއްލުމެއް ލިބިފައިވާނަމަ އެކަން ދިރާސާ ކުރުމަށްފަހު ހާމަކުރައްވާނެކަމަށެވެ.
Advertisement
This content is created and paid for by advertisers and does not involve Voice Journalists
