އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ބޯންމައުތު ފަސޭހަކަމާއި އެކު 3-0 ން ބަލިކޮށް ލީގު ތާވަލުގެ ތިން ވަނާގައި އޮތް ނިއުކާސަލް ޔުނައިޓެޑާއި ޕޮއިންޓްގެ ގޮތުން މެންޗެސްޓަރ ޔުނައިޓެޑް އާރާ ހަމަކޮށްފިއެވެ.

މިވަގުތު ރަގަޅު ފޯމެއްގައި އޮތް މެންޗެސްޓަރ ޔުނައިޓެޑަށް މިރޭގެ މެޗުގައި ލީޑު ނަގައިދިނީ ބުރެޒިލްގެ މިޑްފީލްޑަރ ކަސަމީރޯއެވެ. މިއީ ޑެންމާކުގެ ތަޖުރިބާކާރު މިޑްފީލްޑަރ ކްރިސްޓިއަން އެރިކްސަން ތަނަވަސްކޮށްދިން ފުރުސަތެއްގައި ކަސަމީރޯ ކާމިޔާބުކޮށްދިން ގޯލެކެވެ. މި ލަނޑާއި އެކު ފުރަތަމަ ހާފުގެ ކުޅުން ނިމިގެންދިޔައީ 1-0 ން މެންޗެސްޓަރ ޔުނައިޓެޑް ކުރީގައި އޮވެގެންނެވެ.

ދެވަނަ ހާފުގައި މެންޗެސްޓަރ ޔުނައިޓެޑުން ވަނީ އެޓީމުގެ އެޓޭކުތަށް ފުރަތަމަ ހާފަށްވުރެ ވަރުގަދަކޮށްފައެވެ. ނަތީއްޖާއެއްގެ ގޮތުން ދެވަނަ ހާފުގެ ވަރަށް ކުރީކޮޅު އެޓީމުގެ އިގިރޭސި ޑިފެންޑަރ ލޫކް ޝޯ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިއީ އެޓީމުގެ އާޖެންޓީނާގެ ޒުވާން ފޯވާޑް އަލެޖަންޑްރޯ ގާނާޗޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

Advertisement

ކަސަމީރޯ ޔުނައިޓެޑްގެ ފުރަތަމަ ލަނޑު ކާމިޔާބުކޮށްދެނީ

މިރޭގެ މެޗުގައި ޔުނައިޓެޑްގެ ތިން ވަނަ ލަނޑު ކާމިޔާބުކޮށްދިނީ މާކަސް ރަޝްފޯޑް އެވެ. ފަހު ހާފުގެ 86 ވަނަ މިނެޓްގައި ޕޯޗުގަލްގެ މިޑްފީލްޑަރ ބްރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި ރަޝްފޯޑް މި ލަނޑުކާމިޔާބުކުރި އިރު، މިއީ ލީގުގައި އޭނާ ކާމިޔާބުކުރި 7 ވަނަ ލަނޑެވެ. އަދި އެންމެ ފަހުން ކުޅުނު 4 މެޗުގައި ރަޝްފޯޑް ސްކޯކޮއްފައިވާއިރު ލީގުގައި އެންމެ ފަހުން ލީގުގައި ވުލްވްސް އާއި ދެކޮޅަށް ކުޅުނު މެޗުގައި އަޚުލާގީ މައްސަލައަކާއި ހުރެ ކޯޗު އެރިކް ޓެން ހާގް އެމެޗުގެ ފުރަތަމަ އެގާރައިން ފުރުސަތު ނުދިނެވެ.

މިރޭގެ މެޗުން ލިބުނު ތިން ޕޮއިންޓާއި އެކު 17 މެޗުން 35 ޕޮއިންޓް ހަމަކޮށް ލީގުގެ ދެވަނާގައިއޮތް މެންޗެސްޓަރ ސިޓީއާއި ދެމެދުގައިވާ ފަރަގު އެޓީމުން ވަނީ އެއް ޕޮއިންޓަށް ކުޑަކޮށްފައެވެ. މިރޭގެ މެޗުން ބަލިވި ބޯންމައުތު 18 މެޗު ކުޅެގެން އެޓީމަށް ލިބިފައިވަނީ 16 ޕޮއިންޓާއި އެކު ލީގުގެ ތާވަލުގެ 15 ވަނަ އެވެ.

ލޫކް ޝޯ ޔުނައިޓެޑްގެ ދެވަނަ ލަނޑުޖެހުމަށް ފަހު އުފާފާޅުކުރަނީ

ޕްރެމިއާ ލީގުގައި މިރޭ ކުޅެވުނު އިތުރު މެޗުތަކުގެ ނަތީއްޖާތަކަށް ބަލާއިރު، ފުލަމް އާއި ލެސްޓާ ސިޓީ ވާދަކުރިމެޗު 1-0 ން ކާމިޔާބުކުރީ ފުލަމް އެވެ. މި މެޗުގެ ހަމައެކަނި ލަނޑު ކާމިޔާބުކޮށްދިނި ސާބިއާގެ ފޯވާޑް އަލެކްސަންޑާ މިޓްރޮވިޗް އެވެ. މީގެ އިތުރުން އެވަޓަން އާއި ބްރައިޓްން ވާދަކުރި މެޗު 4-1 ން ކާމިޔާބުކުރީ ބްރައިޓަން އެވެ.