އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން އިއުލާން ކުރައްވާފައިވާ, ރައީސް އިބްރާހިމް މުހައްމަދު ޞާލިހް ބައިވެރިވެވަޑައިގަންނަވާ ކެންޕެއިން ޖަލްސާއެއް މިރޭ ބާއްވާ ގޮތަށް ހަމަޖެހިއްޖެއެވެ.

ރައީސް ސޯލިހްގެ ކެމްޕެއިން ޓީމުން ހާމަކޮށްފައިވާ ގޮތުގައި އެ އިވެންޓް އޮންނާނީ އެމްޑީޕީގެ މައި ހަރުގޭގައި މިރޭ ނުވައެއް ޖަހާއިރުއެވެ.

މިއީ އެމްޑީޕީގެ ޕްރައިމަރީ އަށް ކުރިމަތިލެއްވި ފަހުން، ރަސްމީ ގޮތެއްގައި ކެމްޕެއިން ހަރަކާތެއްގައި ރައީސް ޞާލިހް ބައިވެރިވެވަޑައިގަންނަވާ ފުރަތަމަ ފަހަރެވެ.

Advertisement

އެމްޑީޕީ ޕްރައިމަރީގައި ރައީސް ޞާލިހާއި ވާދަކުރައްވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އެމަނިކުފާނު އަންނަނީ އަމަލީގޮތުން މާލެއާއި އަތޮޅު ތެރޭގައި ކެންޕެއިން ހަރަކާތްތައް ބާއްވައި އެ ހަރަކާތް ތަކުގައި ބައިވެރި ވަމުންނެވެ. އެގޮތުން މިއަދު ހަވީރު ހިޔާ ފްލެޓު ސަރަހައްދުގައި ހާއްސަ ހަރަކާތެއް ހިންގުމަށް ހަމަޖެހިފައިވާ ކަމަށް އެމަނިކުފާނުގެ ކެމްޕެއިން ޓީމުން ބުނެއެވެ.

ނަޝީދުގެ ޕްރައިމަރީ ކެންޕެއިން ތެރެއިން އެމަނިކުފާނު އަންނަނީ ރައީސް ޞާލިހްގެ ކެންޕެއިން ޖަލްސާތަކުން އެމަނިކުފާނު ނުފެންނާތީ އެކަމާއި ވަރަށް ބޮޑަށް ފާޑުވިދާޅުވަމުންނެވެ. އެގޮތުން، ރައީސް ޞާލިހް ކުރައްވަނީ ޣައިރު ހާޒިރުގައި ކުރައްވާ ކެމްޕޭން އެއްކަމަށްވެސް ނަޝީދު ވަނީ ވިދާޅުވެފައެވެ.