ރާއްޖޭގެ އިޤުތިޞާދު ކޮވިޑް-19ގެ ކުރިން ހުރި މިންވަރަށް ރުޖޫއަވެފައިވާކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެފައިވާއިރު،  ޑޮލަރުގެ ތާށިކަން ކުރިމަތިވާ ސަބަބަކީ ކޮބައިތޯ ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމު އަމީރާއި ސުވާލުކުރައްވައިފިއެވެ. 

ރާއްޖެއިން ބޭރުގައި ތައުލީމު ހާސިލުކުރާ ދަރިވަރުންގެ ތެރެއިން އޭލެވެލްއަށްވުރެ ދަށް މަރުހަލާތަކުގައި ކިޔަވާ ކުދިންނަށް ޑޮލަރު ދޫކުރުން ބީއެމްއެލް އިން ހުއްޓައިލުމާ ގުޅިގެން ޝިޔާމް ކުރެއްވި ޓްވީޓެއްގައި ވަނީ އެއީ ރާއަޖެއިން ބޭރުގައި ދިރިއުޅޭ އެތައް ސަތޭކަ ދަރިވަރަކަށް ދެވޭ އަނިޔާއެއް ކަމަށް ވިދާޅުވެފައެވެ. 

"މިތަން ފެންނާތީ އެމް.އެމް.އޭ އަދި ބީ.އެމް.އެލް އަށް ގޮސް މިވާހަކަދެއްކިން. ގަވަރުނަރުވެސް މިހާރު ހީވަނީ ނަރަކަށް ބާރުކޮށްލާފަހުރިހެން. ކަންއޮތްގޮތް ހާމަކުރައްވަން ޖެހިލުންވެ ވަޑައިގެން ހުންނެވީ." ޝިޔާމް ވިދާޅުވި އެވެ. 

މީގެ އިތުރުން ޝިޔާމް ވަނީ، ރާއްޖޭގެ އިޤްތިޞާދު މިހާރުހުރީ 2019 ގައި ހުރި ވަރަށްކަމަށް ސަރުކާރުން ބުނާއިރު ޑޮލަރު މިހާ ތާށިވެގެން މިއުޅެނީ ކީއްވެތޯ ސުވާލު ކުރައްވާފައެވެ. 

"ފައިސާ ޗާޕުކޮށް ދައުރުކުރީމާ ހުރިހާބުރައެއް މިވީ ރައްޔިތުންގެ ޖީބަށް. ނުވިތާކަށް ބޮޑުކުރި ޖީއެސްޓީ އާއެކު ދިރިއުޅުމުގެ އަގު އެތައްގުނައެއް އުފުލިއްޖެ. އޯގާތެރި ސަރުކާރު؟؟" ޝިޔާމް ސުވާލު ކުރެއްވި އެވެ. 

ކޮވިޑު-19 ގެ ކުރިން ޑެބިޓު ކާޑު މެދުވެރިކޮށް ބޭނުންވަރަކަށް ޑޮލަރުގެ މުއާމަލާތް ރާއްޖެއިން ބޭރުގައި ކުރެވުނު ނަމަވެސް ކޮވިޑު-19 އާއި ގުޅިގެން ރާއްޖެއިން ބޭރުގައި އުޅޭ ފަރާތްތަކަށް ޑޮލަރުން މުއާމަލާތް ކުރެވޭ މިންވަރު ވަނީ މަދުކޮށްފައެވެ. އެހެން ނަމަވެސް ރާއްޖެއިން ބޭރުގައި އުޅޭ ކިޔަވާ ކުދިންނަށް ވަކި ވަަރަކަށް ޑޮލަރު މިހާތަނަށް އައީ ދޫކުރަމުންނެވެ. އަދި ކޮލެޖު/ސްކޫލް ފީ އަށް ވާ އަދަދު އެއްކޮށް ޑޮލަރުން ދެއްކެއެވެ.