އެމްޑީޕީގެ ޕްރައިމަރީ ބޯމަތިވެފައި ވާއިރު، ޕްރައިމަރީގައި ވާދަކުރައްވާ ކުރީގެ ރައީސް، އަދި އެމްޑީޕީގެ ރައީސް މުހައްމަދު ނަޝީދާއި އެމަނިކުފާނުގެ ފެކްޝަނުގެ މެންބަރުން އެންމެ އަޑު ހަރުކޮށް ދައްކަވާ، ފާޑުވިދާޅުވާ ވާހަކަ އަކީ ރައީސް އިބްރާހިމް މުހައްމަދު ޞާލިހު "ރިއެކްޓް" ނުކުރައްވާ ވާހަކައެވެ. 

އެގޮތުން، ރައީސް ޞާލިހް ވެރިކަމަށް ވަޑައިގަންނަވަން ވެވަޑައިގެންނެވި ވައުދުތަށް ނުފުއްދަވައި އެކަމާއި ގުޅިގެން ވާހަކަ ދެއްކުމުންވެސް ރިއެކްޓް ނުކުރައްވާ ކަމަށާ، ގައުމުގެ ކަންކަން ބޮއްސުންލައިގެން ދާއިރުވެސް ރިއެކްޓް ނުކުރައްވާ ކަމަށް ނަޝީދާއި އެމަނިކުފާނުގެ ފެކްޝަނުން އަންނަނީ ބުނަމުންނެވެ.  

އެހެންނަމަވެސް، މީގެ ގާތްގަނޑަކަށް 5 އަހަރު ކުރިން، ރައީސް ޞާލިހުގެ ރިޔާސީ ކެންޕެއިން ދުވަސްވަރު، ރައީސް ނަޝީދުގެ ފެކްޝަނުގައި ހިމެނިވަޑައިގަންނަވާ އެމަނިކުފާނުގެ ވަރަށް އަރިސް ބޭފުޅެއް ކަމުގައިވާ، މަޖިލީހުގެ ނައިބު ރައީސް އިވާ ވަނީ ރައީސް ރިއެކްޓް ނުކުރައްވައި މަޑުމައިތިރި ކަމާއި ހިކުމަތްތެރިކަން އިސްކުރައްވާތީ އެކަމަށް ވަރަށް ބޮޑަށް ތައުރީފް ކުރައްވާފައެވެ. 

Advertisement

އެގޮތުން، އީވާ ވަނީ ރައީސް ޞާލިހު ރައްޔިތުންގެ މަޖިލީހުގެ މެންބަރެއްގެ ގޮތުގައި ހުންނެވި އިރު މަޖިލީހުގެ ތަޅުމުގައި ހިނގައިދިޔަ ހާދިސާއަކުން މިސާލު ނަންގަވައި އެދުވަހުވެސް އެމަނިކުފާނު ކަން ކުރެއްވި ގޮތާއިމެދު ތައުރީފު ކުރައްވާފައެވެ. 

"އަޅުގަނޑުމެން އެންމެން ހަމަ ފުމެނަގަނީ. ޕީޕީއެމް މެންބަރުން ހަޅޭލަވަނީ. އެކަމު އިބޫ ހަމަ އެ އިންނެވި ގޮތަށް އިންނެވީ. އިބޫ ހަމަ އެ އިންނެވި ގޮތަށް އިންނަވައި ވިދާޅުވީ، އަލީ އާރިފު އަރިހުން ކިހިނެއް ހެއްޔޭ މިވަނީ. އެއީ އިބޫ. މުޅިތަން، ވަށައިގެން ކިތަންމެ ހަލަބޮލި ވިޔަސް. މީހުން ކިތަންމެ ވަށައިގެން ހަލަބޮލި ވިޔަސް، އަދި ސިޔާސީ މަޝްރަހު ހަލަބޮލި ވިޔަސްވެސް، ކިތަންމެ ބިރު ވެރި ކަމެއްގެ ތެރޭގައި ވިޔަސް އިބޫ ހަމަ އިންނަވާނީ އެ ކާމް ކަންމަތީގައި." ރައީސް ޞާލިހު ކަންކަމަށް ރިއެކްޓް ނުކުރައްވައި މަޑުމައިތިރި ކަން އިސްކުރައްވާތީ އެކަމަށް ތައުރީފް ކުރައްވައި އީވާ ވިދާޅުވި އެވެ. 

މިއާއެކު އީވާ ވަނީ، ރައީސް ޞާލިހާއި އެކުގައި އޭނާ މަސައްކަތް ކުރައްވާތާ އޭރު ވެސް 10 އަހަރު ވެފައިވާ ކަމަށާ، މަޖިލީހުގެ މެންބަރެއްގެ ގޮތުގައި އެންމެ ފުރަތަަމަ އީވާ އިންތިހާބު ވީއިރުވެސް ރައީސް ޞާލިހް ހުންނެވީ އެމްޑީޕީގެ ޕާލަމެންޓްރީ ގުރޫޕުގެ ލީޑަރު ގެ ގޮތުގައި ކަމަށެވެ. އަދި އޭގެ ފަހުން، ގުޅިފައިވާ ކޯލިޝަންގެ ޕާލިމެންޓްރީ ގްރޫޕްގެ ލީޑަރުގެ ގޮތުގައިވެސް އެމަނިކުފާނު ހުންނެވި ކަމަށާ، އޭރުވެސް، ސިޔާސީ މަޝްރަހު ހަލަބޮލި ވެގެން ގޮސް، އެމްޑީޕީގެ ވެރިކަމެއް ވެއްޓި، އެ ނޫންވެސް އެތައް ބިރުވެރި ކަމަކާއި ކުރިމަތިލާން ޖެހުނު ކަމަށާ، އޭރުވެސް އެމަނިކުފާނު އިސްކުރެއްވީ ވިސްނުން ކަމަށް އީވާ ވިދާޅުވި އެވެ. 

"މި 10 އަހަރު ތެރޭގައި އަޅުގަނޑަށް ފެނުނު ތަނުގައި، ވިސްނުންތެރި ކަމާއި އެކުގައި ނޫނީ އިބޫ އެއްވެސް ނިންމުމެއް ނުވެއް ނިންމަވާނެ. އަދި އެއްޗެއްވެސް ވިދާޅުނުވާނެ. ވަގުތު ނަންގަވާނެ ވިސްނާލަން. ވަގުތު ނަންނަވާނެ އެއްޗެއް ވިދާޅުވުމުގެ ކުރިން، ކަމެއް ނިންމެވުމުގެ ކުރިން. ވިސްނުން ނޫން އެހެން އެއްޗެއް އިސްކުރައްވާ ތަނެއް އަޅުގަނޑަކަށް ނުފެނޭ." އީވާ ވިދާޅުވިއެވެ. 

އަދި މީގެ އިތުރުން، އެމްޑީޕީ އެންމެ މާޔޫސްވި ދުވަހުވެސް ރައީސް ޞާލިހް ހުންނެވީ އުއްމީދު ކަނޑައި ނުލައްވާ ކަމަށާ، އެވަގުތުވެސް އެންމެންގެ އުއްމީދު އައު ކޮށްދެއްވުމުގައި ހުންނެވީ އެމަނިކުފާނު ކަމަށް އީވާ ވިދާޅުވި އެވެ. 

އީވާ ވިދާޅުވީ އެ 10 އަހަރު ތެރޭގައި ރައީސް ޞާލިހު އަކީ ކާކުކަން ދަސްވެ، އެމަނިކުފާނަށް އިތުބާރު ކުރައްވަން ދަސްވެފައިވާ ކަމަށާ، އަދި އެމަނިކުފާނަކީ އެންމެނާއި ގުޅިގެން ރަނގަޅު ނިންމެވުން ތަކެއް ނިންމަވާނެ ބޭފުޅެއްކަން ޔާގީން ވެފައިވާކަމަށެވެ.