މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ދަފްތަރުގައި ޕާޓީގެ ރައީސް މުހައްމަދު ނަޝީދަށް ތާއީދުކުރައްވާ ބޭފުޅަކު ހުރިކަމަށް ގަބޫލުފުޅު ނުކުރައްވާއިރު އެމްޑީޕީގެ ރިޔާސީ ޓިކެޓު ހޯއްދެވުމަށް ބާއްވާ އެތެރޭގެ އިންތިޚާބުގައި ވާދަކުރައްވަނީ ކީއްކުރަންތޯ އައްސަވާ ޑިފެންސް މިނިސްޓަރު މާރިޔާ ދީދީ ރައީސް ނަޝީދާއި ސުވާލުކުރައްވައިފި އެވެ.
މާރިޔާ މިފަދައިން ސުވާލު އުފައްދަވާފައި ވަނީ ރައީސް ނަޝީދަށް ތާއީދުކުރާ ގިނަ ބަޔަކު އެމްޑީޕީގެ ދަފްތަރުން އުނިކޮށްފައިވާކަމަށް ނަޝީދުގެ ކެމްޕޭނު ޓީމުން ކުރަމުންދާ ތުހުމަތުތަކަށް ރައްދުދެއްވާ އެމްޑީޕީގެ މައި ހަރުގޭގައި ބޭއްވި ރައީސް ސޯލިހުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.
މާރިޔާ ވިދާޅުވީ ނަޝީދަށް ތާއީދުކުރައްވާ 39000 މެމްބަރުން ޕާޓީއިން ކަނޑާލާފައިވާކަމަށް އެމަނިކުފާނު ވިދާޅުވަމުންދާކަމަށެވެ. އެހެން ނަމަވެސް އެމްޑީޕީގެ ދަފްތަރުގައި ތިބީ ހަމައެކަނި ރައީސް ސޯލީހަށް ތާއީދުކުރައްވާ މެމްބަރުންކަން ގަބޫލުފުޅުކުރަން ދަތިފުޅުވާކަމަށް މާރިޔާ ވިދާޅުވިއެވެ.
އަދި ކަން އޮތީ އެހެން ކަމަށް ވާނަމަ ކުރިއަށް އޮތް ރިޔާސީ އިންތިޚާބުގައި ރައީސް ސޯލިހާއި ވާދަކުރައްވަން ނަޝީދު ނިކުމެވަޑައިގަތް ސަބަބަކީ ކޮބައިތޯ މާރިޔާ ވަނީ އައްސަވާފައެވެ.
"މިފަހަރު މި ވޯޓުލާ އެންމެންނަކީ އެމަނިކުފާނަށް ތާއީދުކުރާ މީހުންކަމަށް ވަންޏާ، ދެން ކީއްވެބާއޭ އެ (ނަޝީދު) ނިކުމެވަޑައިގެން އެ ހުންނެވީ މި ޕްރައިމަރީގައި ވެވަޑައިގަންނަވަން؟"
ޑިފެންސް މިނިސްޓަރު މާރިޔާ ދީދީ
މަރިޔާ ވިދާޅުވީ އެމްޑީޕީއަކީ ފަހަރެއްގައިވެސް ވަކި މީހެއްގެ ވަށާ އެނބުރޭނެ ޕާޓީއެއް ނޫން ކަމަށެވެ. އެމްޑީޕީ ވުޖޫދަށް އައީ 30 އަހަރު ވަންދެން އެކެއްގެ ވަށާ އެނބުރެމުން ދިޔަ ދިއުން ހުއްޓުވުމަށްކަމަށް އޭނާ ވިދާޅުވިއެވެ.
ރައީސް ސޯލިހު ނިކުމެވަޑައިގެން ހުންނެވީ މުޅި ރާއްޖެ ތަރައްގީކުރަން ކަމަށާއި، އެމަނިކުފާނުގެ އެ މަސައްކަތުގައި އުފަލާއެކު ބައިވެރިވެ ވަޑައިގަންނަވާނެކަމަށް މާރިޔާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
