އިންތިޚާބުތައް ކާމިޔާބުކުރާނެ ގޮތުގެ ފޯމިއުލާ އެނގިވަޑައިގަންނަވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ އެމްޑީޕީ ހަރުގޭގައި ބެއްވި ޖަލްސާއެއްގައި ވާހަކަދައްކަވަމުންނެވެ.
ރައީސް ސޯލިހު ވިދާޅުވީ ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިކުމެވަޑައިގެން ހުންނެވީ އެމްޑީޕީއާއެކު ކުރިއަށް ދިއުމަށް ކަމަށެވެ.
އިންތިޚާބުތައް ކާމިޔާބު ކުރައްވާނެ ފޯމިއުލާއާއި ރައްޔިތުންގެ ވޯޓު ހޯއްދަވާނެ ފޯމިއުލާވެސް އެމަނިކުފާނަށް ރަނގަޅަށް އެނގިވަޑައިގަންނަވާކަމަށް ރައީސް ސޯލިހު ވިދާޅުވިއެވެ. އަދި އެމަނިކުފާނަކީ މީގެ ކުރިން 6 އިންތިޚާބު ކާމިޔާބު ކުރައްވާފައިވާ ބޭފުޅެއްކަންވެސް ފާހަގަކުރެއްވިއެވެ.
"އަޅުގަނޑު ނިކުމެ މި ހުރީ ތަޖުރިބާތަކަކާއެކު. ރައްޔިތުން ކުރިމައްޗަށް ނިކުމެ 6 އިންތިޚާބު އަޅުގަނޑު ކާމިޔާބުކޮށްފިން. ރައްޔިތުންގެ މަޖިލީހުގެ 5 އިންތިޚާބު ކާމިޔާބުކޮށްފިން. ރިޔާސީ 1 އިންތިޚާބު ކާމިޔާބުކޮށްފިން. އިންތިޚާބު ކާމިޔާބު ކުރާނެ ފޯމިއުލާ، ރައްޔިތުންގެ ވޯޓު ހޯދާނެ ގޮތް އަޅުގަނޑަށް ވަރަށް ސާފު"
ރައީސް ސޯލިހު
ރައީސް ސޯލިހު ވިދާޅުވީ ރިޔާސީ އިންތިޚާބު އެމްޑީޕީއަށް ކާމިޔާބު ކުރެވޭނެ ގޮތްތަކާއި ދޭތެރޭގައި މެމްބަރުން ވަރަށް ފުންކޮށް ވިސްނަން ޖެހޭކަމަށެވެ.
މިހާތަނަށް ރިޔާސީ އިންތިޚާބުތައް ކާމިޔާބުވެފައި އޮތީ ކޯލިޝަންއެއްގެ ތެރެއިންކަމަށް އެމަނިކުފާނު ވިދާޅުވިއެވެ. އަދި 2013 ވަނަ އަހަރުގެ ރިޔާސީ އިންތިޚާބު އެމްޑީޕީއަށް ނާކާމިޔާބުވީ އެ އިންތިޚާބުގައި ވާދަކުރެއްވި އެމްޑީޕީގެ ރައީސް މުހައްމަދު ނަޝީދުގެ ފަހަތްޕުޅަށް އަރާނެ ސިޔާސީ ބައިވެރިޔަކު ނުވުމުންކަމަށް ރައީސް ސޯލިހު ވިދާޅުވިއެވެ.
އެކަންކަމަށް ވިސްނާއިރު، ކުރިއަށް އޮތް ރިޔާސީ އިންތިޚާބުގައި ކޯލިޝަނެއް ހެދޭނީ ކޮން ބޭފުޅަކާއި އެކުގައިތޯ މެމްބަރުން ވިސްނަވަން ޖެހޭކަމަށް އެމަނިކުފާނު ވަނީ ވިދާޅުވެފައެވެ. ސީދާކޮށް ކޯލިޝަންއެއް ހެދޭނީ ރައިސް ސޯލިހަށްކަމަށް ވިދާޅު ނުވިނަމަވެސް، އެމަނިކުފާނަކީ ކޯލިޝަން ދަމަހައްޓާފައިވާ ހަމައެކަނި ލީޑަރެވެ.
އެހެންކަމުން އެމްޑީޕީއަށް ވެރިކަން ހޯދޭނެ ފޯމިއުލާއެއްކަމަށް ރައީސް ސޯލިހު ގަބޫލުކުރައްވަނީ އަނެއްކާވެސް ކޯލިޝަންއެއް ހެދުންކަމަށް ބެލެވެއެވެ. އަދި މިހާރު އެމްޑީޕީގެ ޕްރައިމަރީއަށް ވާދަކުރައްވާ ދެ ލީޑަރުންނަށް ބަލާއިރު، ނަޝީދާއި އެއްކޮށް ކޯލިޝަނެއް ހަދާނެ ސިޔާސީ ޕާޓީއެއް ނެތްކަން އެމަނިކުފާނު ވަނީ ނުސީދާކޮށް ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
