ސަރުކާރު ބަދުނާމުކޮށް އެމްޑީޕީގެ ތެރޭގައި ފިތުނަ އުފައްދަން މަސައްކަތް ކުރާ ފަރާތްތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަރުގަދަ އިންޒާރެއް ދެއްވައިފިއެވެ. 

މިރޭ އެމްޑީޕީގެ މައި ހަރުގޭގައި އޮތް ރައީސް ސޯލިހުގެ ކެމްޕޭނު ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ، އެމަނިކުފާނު ވެރިކަމާއި ހަވާލުވެވަޑައިގަތް ފުރަތަމަ ދުވަހުން ފެށިގެން ސަރުކާރު ބަދުނާމުކުރުމަށް ޕާޓީތެރެއިން މަދު ބަޔަކު މަސައްކަތް ކުރަމުންދާކަމަށެވެ. 

އެމީހުން މަސައްކަތް ކުރަމުންދަނީ ސަރުކާރު ބަދުނާމުކޮށް ޕާޓީ ތެރޭގައި ފިތުނަ އުފެއްދުމަށްކަމަށް ރައީސް ސޯލިހު ވިދާޅުވިއެވެ. 

އެކަންކަން ފާހަގަކުރައްވާ ރައީސް ސޯލިހު ވަނީ އެފަދައިން ސަރުކާރު ބަދުނާމު ކުރުމުގެ މަސައްކަތް މިހާރުން މިހާރަށް ހުއްޓާލުމަށް ގޮވާލާ އެ ފަރާތްތަކަށް އިންޒާރު ދެއްވާފައެވެ. 

ޕާޓީގެ ތެރެއިން ފިތުނަ އުފައްދަން ކުރަމުންދާ މަސައްކަތް ހުއްޓާލުމަށް ގޮވާލައްވަމުން ރައީސް ސޯލިހުވަނީ ގުޅިގެން މަސައްކަތް ކުރުމަށް އެދިވަޑައިގެންފައެވެ. އަދި ރައްޔިތުންނަށް ވެފައިވާ ވައުދުތައް ފުއްދުމަށް ގުޅިގެން މަސައްކަތް ކުރުމަށް އެދިވަޑައިގަންނަވާކަމަށް ރައީސް ސޯލިހު ވިދާޅުވިއެވެ. 

އެމަނިކުފާނު ވިދާޅު ގޮތުގައި އެމަނިކުފާނުގެ ވެރިކަމުގެ ފާއިތުވި ހަތަރު އަހަރަކީ އިދިކޮޅު ފަރާތްތަކާއި ޕާޓީގެ ތެރެއިންވެސް އެކި ވަރުގެ ފިއްތުންތައް ކުރިމަތިކުރުވި 4 އަހަރެވެ. އެހެން ނަމަވެސް އެ ފިއްތުންތަކުގެ ތެރެއިންވެސް މި ސަރުކާރަށް ހޯދިފައިވާ ކާމިޔާބީތަކާއި ދޭތެރޭ ހިތްޕުޅު ހަމަޖެހިވަޑައިގަންނަވާ ކަމަށް ރައީސް ސޯލިހު ވަނީ ވިދާޅުވެފަ އެވެ.