އެއްވެސް މީހެއްގެ އަޅަކަށް ވެވަޑައިނުގަންނަވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ. 

އެމަނިކުފާނު މިފަދައިން ވިދާޅުވެފައިވަނީ އެމްޑީޕީޕީގެ ރިޔަސީ ޕްރައިމަރީގައި އެމަނިކުފާނުގެ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ރައީސް ސޯލިހު ވަނީ އެމަނިކުފާނު 2018 ގެ ރިޔާސީ އިންތިޚާބުގައި ކުރި ތަޖުރިބާ ހިއްސާކުރައްވާފައެވެ. އެގޮތުން އެ އިންތިޚާބަށް އެމަނިކުފާނު ކުރިމަތިލެއްވި ދުވަހުން ފެށިގެން ހިއްޕަވައިގެން ހުންނެވި ނަސޭހަތެއްގެ ވާހަކަ އެމްޑީޕީ ހަރުގޭގައި ބޭއްވި ޖަލްސާގައި ރައީސް ސޯލިހު ވަނީ ހިއްސާކުރައްވާފައެވެ. 

Advertisement

އެމަނިކުފާނު ވިދާޅުވީ 2018 ވަނަ އަހަރުގެ ރިޔާސީ އިންތިޚާބާއި އެމަނިކުފާނު ކުރިމަތިލުމާއެކު ރައްޓެއްސަކު ބުނި ވާހަކައެއް އަބަދުވެސް ހަނދާނުގައި ބަހައްޓަވާކަމަށެވެ. 

އެމަނިކުފާނުގެ މަގްސަދަކީ އެމްޑީޕީ ކުރިއަށް ގެންދިއުންކަމަށާއި، އަދި އެ މަސައްކަތް ކުރެއްވުމުގައި އެއްވެސް މީހެއްގެ އަޅަކަށް ވެވަޑައި ނުގަންނަވާނެކަމަށް ރައީސް ސޯލިހު ވިދާޅުވިއެވެ. 

އެމަނިކުފާނު ވިދާޅުވީ އެމަނިކުފާނަކީ އެންމެންގެ އަޑު އައްސަވާ ބޭފުޅެއްކަމަށެވެ. އަދި ކަންކަން މަޝްވަރާ ކުރެއްވުމަށް ލޯބިކުރައްވާ ބޭފުޅެއްކަމަށެވެ. 

އެހެން ނަމަވެސް އެމަނިކުފާނުގެ ނިންމުންތައް ނިންމަވަނީ އެންމެންގެ އަޑު އެއްސެވުމަށްފަހު ރައްޔިތުންނަށް އެންމެ ފައިދާވާ ގޮތަށްކަމަށް ރައީސް ސޯލިހު ވިދާޅުވިއެވެ. އަދި ވަކި ބޭފުޅަކު ހިތްހަމަ ޖެއްސުމަށް ރައްޔިތުންގެ މަސްލަހަތު ނަގާނުލައްވާނެކަމަށްވެސް ވަނީ ވިދާޅުވެފައެވެ. 

އެއްވެސް ބޭފުޅެއްގެ އަޅަކަށް ވެވަޑައި ނުގަންނަވާނެކަމަށް ރައީސް ސޯލިހު މިރޭ ވިދާޅުވެފައިވަނީ، އެމަނިކުފާނު ވެރިކަމާއި ހަވާލުވެވަޑައިގެތް ހިސާބުން ޕާޓީގެ ރައީސް މުހައްމަދު ނަޝީދު އެކަހެރި ކުރައްވާފައިވާކަމަށް ނަޝީދުގެ ވަފާދާރުން ވިދާޅުވަމުންދާ ދަނޑިވަޅެއްގައެވެ. 

ޚުދު ނަޝީދުވެސް ވަނީ ރައީސް ސޯލިހަށް ކަންކަމުގައި އަރުވާ ލަފަޔާއި އެއްގޮތަށް އަމަލު ނުކުރައްވާކަމަށް ވިދާޅުވެ ރައީސް ސޯލިހާއި ސަރުކާރަށް ބޮޑެތި ފާޑުކިޔުންތަކެއް އަމާޒުކުރައްވާފަ އެވެ.