އެމްޑީޕީގެ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ވާދަކުރައްވަން ނިކުމެބަޑައިގެން ހުންނެވި މަޖިލީހުގެ ރައީސް މުހައްމަދު ނަޝީދާއި، އޭނާގެ ވަފާތެރިން ރައީސް ސޯލިހަށް ފާޑުކިޔުމުގައި ހައްދުފަހަނަ އަޅާފައިވާ ކަމަށް މި އިންތިޚާބުގައި ރައީސް ސޯލިހަށް ތާއީދުކުރައްވާ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމު ވިދާޅުވެއްޖެ އެވެ. 

ބުދަ ދުވަހުގެ ރޭ އެމްޑީޕީގެ ހަރުގޭގައި ބޭއްވި ރައީސް ސޯލިހުގެ ކެމްޕޭނު ޖަލްސާއެއްގައި ވާހަކަދައްކަވަމުން މީކާއިލް ވިދާޅުވީ 2019 ވަނަ އަހަރުގައި އޮތް މަޖިލީސް އިންތިޚާބަށް އެމްޑީޕީގެ ފަރާތުން މެމްބަރުން ކުރިމަތިލީ ސަރުކާރުގެ ކެންޑިޑޭޓެއްކަމަށް ބުނަމުންކަމަށެވެ. އަދި ސަރުކާރަށް ވާގިވެރިވާނެކަމުގެ ވައުދާއި އެކުކަމަށެވެ. 

އެހެން ނަމަވެސް ރައްޔިތުންގެ މަޖިލީހުގައި ވާދަވެރި އޮޕޮސިޝަނެއް ނެތުމާއެކު، ސަރުކާރު ޖަވާބުދާރީ ކުރުމުގެ މަސައްކަތަކީވެސް އެމްޑީޕީއިން ކުރަން ޖެހޭކަމެއްކަން އޭނާ ފާހަގަކުރެއްވި އެވެ. އަދި ސަރުކާރު ޖަވާބުދާރީ ކުރުމަށް އެމްޑީޕީގެ މެމްބަރުން ވަކާލާތު ކުރުމަކީ މައްސަލައެއް ނޫންކަމަށް އޭނާ ވިދާޅުވިއެވެ. 

Advertisement

އެހެން ވެދާޅުވެ މީކާއިލް ދެން ވިދާޅުވީ ފާޑުކިޔަސް އެކަން ކުރަންވާނީ ވަކި ހައްދެއްގެ ތެރެއިންކަމަށެވެ. އެކުގައި މަސައްކަތް ނުކުރެވޭވަރަށް ފާޑުކިޔުންތައް އަމާޒުކުރާނަމަ އެއީ ހައްދުން ނެއްޓުންކަމަށް މީކާއިލް ވިދާޅުވިއެވެ. 

ރައީސް އިބްރާހިމް މުހައްމަދު ސޯލިހު ކަންކަމުގައި ރިއެކްޓު ނުކުރައްވާކަމަށް އެމަނިކުފާނާއި އިދިކޮޅު ކެންޑިޑޭޓް މުހައްމަދު ނަޝީދާއި އޭނާއަށް ތާއީދުކުރައްވާ މެމްބަރުން މިހާރު ދައްކަވަމުންދާ ވާހަކަތަކަށްވެސް މީކާއިލް ވަނީ ރައްދުދެއްވާފަ އެވެ. 

އެގޮތުން އޭނާ ވިދާޅުވީ ރައީސް ސޯލިހު ކަންކަމުގައި ރިއެކްޓު ނުކުރައްވާ ހިކުމަތްތެރިކަން އިސްކުރުމަކީ މިހާތަނަށް އެމްޑީޕީގެ މެމްބަރުން އެމަނިކުފާނުގެ ކިބައިގައި ހުރި ރަނގަޅު ސިފައެއްގެ ގޮތުގައި ފާހަގަކުރަމުން އައި ކަމެއްކަމަށެވެ. 

އެމަނިކުފާނު ކަންކަމުގައި ރިއެކްޓު ނުކުރައްވާކަން ފާހަގަކުރައްވާ މިއަދު އެމަނިކުފާނަށް މަލާމާތް ކުރަމުންދާ ފަރާތްތައްވެސް މީގެ ކުރިން އެ ސިފަތަކަށް ތައުރީފު ކުރައްވާފައިވާ ފަރާތްތަކެއްކަމަށް މީކާއިލް ވަނީ ވިދާޅުވެފައެވެ.