އަމީނީމަގު ސެގްމެންޓް 2ގެ ތާރުއެޅުން ފިޔަވައި، މަސައްކަތުގެ 95 އިންސައްތަ ނިމިއްޖެ ކަމަށް ރޯޑް ޑިވިލޮޕްމަންޓް ކޯޕަރޭޝަން (އާރްޑީސީ)އިން ބުނެފިއެވެ.

އަމީނީމަގު ހެދުމުގެ މަސައްކަތުގެ އަޕްޑޭޓް ދެމުން އާރްޑީސީން ކުރި ޓުވީޓެއްގައި ބުނީ، އަމީނީމަގު ސެގްމެންޓް 3ގެ ފެނާއި ނަރުދަމާ އަޕްގްރޭޑް ކުރުމާއި ކޭބަލްޓްރޭ އެޅުމުގެ މަސައްކަތް ކުރަމުންދާ ކަމަށެވެ.

އަމީނީ މަގު ޒަމާނީ ފެންވަރަކަށް ހެދުމަށް ފެށި މަޝްރުއުގެ ތެރެއިން، ދެވަނަ ސެގްމަންޓުގެ މަސައްކަތް ފަށާފައި ވަނީ މިިދިޔަ މަހުގެ ތިންވަނަ ދުވަހުއެވެ.

އަމީނީގެ މަގުގެ ދެވަނަ ސެގްމަންޓުގެ މަސައްކަތް ފަށާފައިވަނީ އެމްޑަބްލިއުއެސްސީގެ ހޮޅިތައް އަޕްގްރޭޑް ކުރުމަށް ބޭނުންވާ އާލާތްތައް ލިބުން ލަސްވުމާއި ގުޅިގެން އެ މަސައްކަތް މަޑު ޖައްސާލާފައި އޮތުމަށްފަހުގައެވެ. 

- 1.79 ކިލޯމީޓަރު (މުޅި މަގު)ގައި ތާރު އެޅުން

- މަގުގެ ދުވާރު ހެދިގެން ދާނެ (ހިތްފަސޭހަ، ހިތްގައިމުވާނެ).

- ލޯފަން ބޭފުޅުންނަށް ހާއްސަ ބްރައިލް ބްލޮކް ބެހެއްޓުން

- ނުކުޅެދުންތެރިކަން ހުންނަ ފަރާތްތަކަށް (ފުރޮޅުލީގޮނޑި)ބޭނުން ކުރާ ފަރާތްތަކަށް ހާއްސަކޮށް ފަސޭހައިން އުޅެވޭނެ

- މަގުގެ ފެހިކަން ނުގެއްލޭނެ.

- ބަސްހުއްޓި، ޕާކިންގ ޒޯން، ބަމްޕަރުތަކާއި މަގުބައްތި އަދި މަގުމަތީގައި ނިޝާންތައް ބެހެއްޓުން

- ފެންބޮޑުވުމުގެ މައްސަލައަށް ހައްލު ގެނައުމަށް ޕަމްޕް ބެހެއްޓުން

އަމީނީ މަގު ހެދުމުގެ މަސައްކަތް ހަވާލުކޮށްފައިވާ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) އިން މީގެ ކުރިން ބުނެފައި ވަނީ، ދެވަނަ ސެގްމަންޓުގައި މަގު ހަދާނީ ކަލާފާނު ސުކޫލުގެ ގޭޓާއި ހަމަޔަށް ކަމަށެވެ. 

އަމީނީ މަގު ޒަމާނީ ފެންވަރަކަށް ހެދުމަށް ޕްލޭނިން މިނިސްޓްރީއިން އާރުޑީސީއާއި ހަވާލުކޮށްފައި ވަނީ 84 މިލިއަން ރުފިޔާއަށެވެ. އެއާއެކު އާރުޑީސީއިން އަމީނީ މަގު ހެދުމުގެ މަސައްކަތް 210 ދުވަހުގެ ތެރޭގައި ފުރިހަމަ ކުރަން ޖެހޭނެއެވެ. 

ޒަމާނީ ފެންވަރަށް އަމީނީ މަގު ހަދާ ނިމޭއިރު، އެ މަގަކީ މާލޭގެ ބޮޑެތި މަގުތަކުގެ ތެރެއިން ވަރަށް ހިތްގައިމު މަގަކަށް ވެގެންދާނެކަމަށް އާރުޑީސީއިން ވަނީ ބުނެފައެވެ. އަދި މަގު ހަލާކުވުމުގެ ސަބަބުން މަގު ބޭނުން ކުރާ ފަަރާތްތަކަށް އުފުލަން ޖެހުނު ތަކުލީފު އެހިސާބުން އެއްކޮށް ފިލައިގެން ދާނެކަމަށްވެސް އާރުޑީސީއިން ވަނީ ބުނެފައެވެ.