ފުވައްމުލަކު ސިޓީގައި އެކަށީގެންވާ ތަރައްގީގެ މަޝްރޫއުތައް ހިންގިފައި ނުވާކަމަށް އެރަށަށް ކެމްޕޭނު ދަތުރުފުޅެއްގައި ވަޑައިގެން އެމްޑީޕީގެ ރައީސް މުހައްމަދު ނަޝީދު ވިދާޅުވުމުން މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ރައްދުދެއްވައިފި އެވެ.
ބުދަ ބުހަވުގެ ގޭ އެމްޑީޕީ މައި ހަރުގޭގައި ބޭއްވި ރައީސް ސޯލިހުގެ ކެމްޕޭނު ޖަލްސާއެއްގައި ވާހަކަދައްކަވަމުން ރޮޒޭނާ ވިދާޅުވީ ކިތަންމެ ވަރަކަށް މި ސަރުކާރުން ތަރައްގީގެ މަސައްކަތް ކުރައްވަމުން ދިޔަ ނަމަވެސް އެކަން ނުފެންނަ މީހުން ތިބިކަމަށެވެ.
އެގޮތުން މި ސަރުކާރުން ކަމެއް ކޮށް ނުދެއޭ، ނުވަތަ ރައީސް ސޯލިހު ރަށްތައް ތަރައްގީކޮށް ނުދެއްވައޭ ވިދާޅުވެ ޕާޓީގެ ރައީސް މުހައްމަދު ނަޝީދު ވާހަކަފުޅު ދެއްކެވިއިރު އެމަނިކުފާނު ހުންނެވީ މި ސަރުކާރުން ފުވައްމުލަކުގެ މަގުތައް ޒަމާނީ ފެންވަރަކަށް ހެދުމަށް އަޅާމުންދާ ތާރު މަގުގައިކަމަށް ރޮޒޭނާ ވިދާޅުވިއެވެ.
"ރައީސް ނަޝީދުގެ ކެމްޕޭނުގައި ފުވައްމުލަކަށް ވަޑައިގެން މަގުހަދާ ތާރުގަނޑު މަތީ ހުންނަވައިގެން މި ވިދާޅުވަނީ ފުވައްމުލައް ތަރައްގީއެއް ނުވެޔޭ. ދެން ކީކޭތޯ ދަންނަވާނީ؟ ދެން އެވަރަށް ނުފެނުނީމާ ދެން ނުފެންނާނެ.
މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް
ރޮޒޭނާ ވިދާޅުވީ މި ސަރުކާރުން ކަންކަން ކޮށްނުދޭކަމަށް ރައްޔިތުންނަށް ވިސްނައިދިނުމަށް ޕާޓީގެ ތެރެއިން ރައީސް ސޯލިހާއި ވާދަކުރައްވާ ފަރާތްތައް މަސައްކަތް ކުރި ނަމަވެސް ހަގީގަތް އޮޅުވާ ނުލެވޭނެ ކަމަށެވެ.
އެގޮތުން އެމަނިކުފާނު ގެންދަނީ ކުޑަ ރަށެއް ބޮޑު ރަށެއް ބެއްލެވުމެއް ނެތި ރަށްތައް ތަރައްގީކޮށް ރައްޔިތުންނަށް ބޭނުންވާ އަސާސީ ކަންކަން ފުއްދަވާދެއްވަމުން ކަމަށް ރޮޒޭނާ ވިދާޅުވިއެވެ.
އޭގެ އިތުރުން ރޮޒޭނާ ވިދާޅުވީ މިއަދު ހިތްހަމަ ޖައްސާލަން އަތުގައި ހިފާލައިގެން ބަނދަރަށްދާ ދެމަފިރިން، އަމިއްލަ ރަށުގައި ތިބެގެން ފަޚުރުވެރި ކަމާއެކު ދިރިއުޅެވޭނެ މަގުފަހިކޮށްދެއްވާފައި ވާތީ ރައީސް ސޯލިހަށް ޝުކުރު އަދާކުރައްވާކަމަށެވެ.
Advertisement
This content is created and paid for by advertisers and does not involve Voice Journalists
