ރާއްޖޭގެ އިތުރާއި ދެކުނާއި އަދި މެދުރާއްޖެތެރެއިން ވެސް އިވެނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރިއަށް ވަޑައިގަތުމަށް ހިތްވަރު ދެއްވާ އެމަނިކުފާނަށް ދެވަނަ ދައުރެއް ދިނުމަށް ގޮވަމުން ދާ އަޑުކަމަށް ފޮރިން މިނިސްޓަރު ޝާހިދު ވިދާޅުވެއްޖެ އެވެ.
ޝާހިދު މިފަދައިން ވިދާޅުވެފައިވަނީ ބުދަ ދުވަހުގެ ރޭ އެމްޑީީ މައި ހަރުގޭގައި އޮތް ރައީސް ސޯލިހުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.
ޝާހިދު ވިދާޅުވީ ރައީސް ސޯލިހަކީ ކެތްތެރިކަމާއި މަޑުމައިތިރިކަމުގެ ލާމަސީލު މިސާލެއްކަމަށެވެ. އަދި އެއީ ފަހަރެއްގައިވެސް އެމަނިކުފާނަށް ހުޝާމަދުކުރަން ވިދާޅުވާ އެއްޗެއް ނޫންކަމަށް ޝާހިދު ވަނީ ވިދާޅުވެފައެވެ.
ރައީސް ސޯލިހު ރައްޔިތުންނާއި ދޭތެރޭގައި ވިސްނަވާ ވަރު އެންމެ ބޮޑަށް ފާހަގަކުރެވުނީ ކޯވިޑް ނަވާރައިގެ ބަލިމަޑުކަމުގެ ތެރޭގައިކަމަށް ޝާހިދު ވިދާޅުވިއެވެ.
އެ ތަޖުރިބާ ކޮންމެވެސް ވަރަކަށް ހިއްސާކުރައްވަމުން ޝާހިދު ވިދާޅުވީ ކޯވިޑް ނަވާރައިގެ ވަބާ ދިވެހިރާއްޖެއާއި ކުރިމަތި ވުމާއެި ގުޅިގެން ރައްޔިތުންނަށް ކާޑު ލިބުމުގެ ދަތިކަން ކުރިމަތި ނުވާނެ ގޮތަށް ކަންކަން ތަރުތީބު ކުރެއްވުމަށް ރައީސް ސޯލިހު އިރުޝާދުދެއްވަމުން ގެންދެވިކަމަށެވެ.
ސަރުކާރުގެ ވަޒީރުން މަސްއޫލިއްޔަތުތައް އަދާކުރައްވާތޯ ގަވައިދުން ބައްލަވަމުން ގެންދެވިކަމަށެވެ. އަދި ރާއްޖޭގެ ހާލަތު ގާތުން ބައްލަވަމުން ދިޔަކަމަށް ޝާހިދު ވިދާޅުވިއެވެ.
ނަތީޖާއެއްގެ ގޮތުން ކޯވިޑްގެ އެންމެ ދަތިހާލުގައިވެސް އެއްވެސް ރައްޔިތަކަށް ކާބޯތަކެތި ލިބުމުގެ ދަތިކަން ކުރިމަތިވެފައި ނުވާނެކަން ޝާހިދު ފާހަގަކުރެއްވިއެވެ.
އޭގެ އިތުރުން ރައްޔިތުންގެ ރައްކާތެރިކަން ކަށަވަރުކުރުމަށްޓަކައި، ކޯވިޑްއިން ރައްކާތެރިވާނެ ވެކްސިން ހޯދުމުގެ މަސައްކަތް ދުރާލާ ސަރުކާރުން ފަށާފައިވާނެ ކަމަށާއި، ނަތީޖާއެއްގެ ގޮތުން ކޯވިޑް ވެކްސިން މާކެޓަށް ނެރުނުތާ 48 ގަޑިއިރުގެ ތެރޭގައި ދިވެހިންނާއި ހަމަޔަށް ގެނެސްފައިވާކަން އޭނާ ފާހަގަކުރެއްވިއެވެ.
ހަމައެހެންމެ ކޯވިޑްގެ ދަތި ހާލުގައިވެސް ފެނާއި ނަރުދަމާގެ މަސައްކަތްތައް ބާރު ސްޕީޑުގައި ކުރިއަށް ގެންގޮސްފައިވާއިރު، މި ސަރުކާރުން ރައްޔިތުންނަށް ވީ ވައުދުތައް ފުއްދުމަށް ރައީސް ފަހަތަށް ޖެހިވަޑައި ނުގަންނަވާކަމަށް ޝާހިދު ވަނީ ވިދާޅުވެފައެވެ.
ޝާހިދު ވިދާޅުވީ ރައީސް ސޯލިހު ގައުމަށް ކޮށްދެއްވި ޚިދުމަތްތައް މިއަދު ރައްޔިތުން ބަލައިގެންފައިވާކަމަށެވެ. އަދި އެމަނިކުފާނުގެ ދެވަނަ ދައުރެއް ރައްޔިތުން ދެކެން ބޭނުންވާކަން ރާއްޖޭގެ އެކި ކަންކޮޅުތަކަށް ބަލާލުމުންވެސް ހާމަވެގެންދާކަމަށެވެ.
"ކަންފަތް ދިއްކޮށްލީމަ އިވެނީ އެންމެ އަޑެއް، ކޮންމެ އަތަކަށް ދިއްކޮށްލިޔަސް އިވެނީ ކުރިއަށް ކުރިއަށް، ރައީސް ސޯލިހު ކުރިއަށް، އެއީ އިވޭ އަޑަކީ. އުތުރަށް ދިއްކޮށްލިޔަސް، ދެކުނަށް ދިއްކޮށްލިޔަސް މެދު ރާއްޖެތެރެއިންވެސް އުތުރި އަރަނީ ރައީސް އިބްރާހިމް މުހައްމަދު ސޯލިހު ކުރިއަށް ވަޑައިގަންނަވާށޭ"
ފޮރިން މިނިސްޓަރު ޝާހިދު
ޝާހިދު އިތުރަށް ވިދާޅުވީ އެމްޑީޕީ ކުރިއަށް ގެންދެވޭނެ ލީޑަރީ ރައީސް ސޯލިހުކަމަށެވެ. އަދި އެމްޑީޕީގެ ވެރިކަން ދެމެހެއްޓޭނީވެސް އެމަނިކުފާނަށް ދެވަނަ ދައުރެއް ދެއްވައިގެން ކަމަށެވެ.
Advertisement
This content is created and paid for by advertisers and does not involve Voice Journalists
