އަދުގެ ސަރުކާރުން ފަށާފައިވާ ތަރައްގީގެ މަޝްރޫއުތައް ނުހުއްޓި ކުރިއަށްގެންދެވޭނީ، 2023 ވަނަ އަހަރު ތަފާތު ފިކުރުކާއި އެކު ޚިޔާލު އެއްގޮތް ކޮށްގެން މަސައްކަތް ކުރެވޭނެ ފަރާތެއް އިންތިހާބު ކޮށްގެން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

ރ.މީދޫގައި ބޭއްވި ކެމްޕެއިން ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ އެމްޑީޕީ އަށް 2008 ވަނަ އަހަރު ވެރިކަން ލިބުނު ގޮތާއި ވެރިކަން ގެއްލިގެން ދިޔަ ގޮތް އެންމެންގެ ހަނދާނުގައި ހުންނާނެ ކަަމަށާ، އަދި 2012 އިން 2018 އަށް އެމްޑީޕީ މަގުމަތިވި ގޮތް ހަނދާން ނައްތާލައިގެން ނުވާނެ ކަަމަށެވެ.

އަދި އެމްޑީޕީގެ އެތެރޭގެ އިންތިޚާބުގައި ވިސްނަންވީ ކުރިއަށް އޮތް ރިޔާސީ އިންތިޚާބު ކާމިޔާބު ކުރެވޭނެ ގޮތެއް ކަމަށް ރައީސް ވިދާޅުވިއެވެ.

މީގެ އިތުރުން ރާއްޖޭގެ އެކި ހިސާބުތަކުގައި ތަފާތުކުރުމެއް ނެތި، ގިނަ މަސައްކަތްތަކެއް މިހާރު ކުރިއަށްދާ ކަން ފާހަގަކުރައްވައި އެ މަޝްރޫޢުތައް ކުރިއަށް ގެންދިއުމަށް ތަފާޓު ފިކުރުތަކާއި އެކު މަސައްކަތްކުރެވޭނެ ވެރިއަކު ހޮވުން މުހިންމު ކަމަށް ރައީސް ވިދާޅުވިއެވެ.

"ދަރިންނަށް ތައުލީމް ދިނުން ކަމުގައި ވިޔަސް، ދަތުރު ފަތުރުގެ ނިޒާމް ކަމުގައި ވިޔަސް، ލަފާފުރުން ދަތިވެފައި ހުރި ރަށްރަށުގެ ލަފާފުރުން ހައްލު ކޮށްދިނުން ކަމުގައި ވިޔަސް، ޒުވާނުންނަށް ކުޅިވަރު ކުޅެވޭނެ ގޮތްތައް ހޯދައިދިނުން ކަމުގައި ވިޔަސް، މިސްކިތް ތައް އަލަށް އިމާރާތް ކުރުމާއި އިސްލާމީ މަރުކަޒުތައް ގާއިމް ކުރުން ކަމުގައި ވިޔަސް، މިފަދަ އެތައް އެތައް ޕްރޮގްރާމެއް ރާއްޖޭގެ އެކި ކަންކޮޅުތަކުގައި އަޅުގަނޑުމެން މިގެންދަނީ ކުރަމުން." ރައީސް ޞާލިހު ވިދާޅުވިއެވެ. 

އެހެންކަމުން އެ މަޝްރޫއު ތައް ހުއްޓުމެއްނެތި ކުރިއަށް ގެންދިޔުމަށްޓަކައި، މިއަހަރު ބާއްވާ ރިޔާސީ އިންތިހާބު އެމަނިކުފާނު ކާމިޔާބު ކުރުމަކީ ވަރަށް މުހިންމުކަމެއް ކަމުގައި ރައީސް ވިދާޅުވި އެވެ. 

ރައީސް ޞާލިހު ވިދާޅުވީ، ރާއްޖޭގެ ސިޔާސީ މަސްރަހު އޮތް ގޮތުން، އެއްވެސް މީހަކު އެކަނި ނުކުމެ %50 ވޯޓު ހޯދުމަކީ ވާނެ ކަމެއް ނޫން ކަމަށެވެ. 

ދިވެހިރާއްޖޭގައި މިހާރު އޮތް އެންމެ ބޮޑު ޕާޓީ އަކީ އެމްޑީޕީ ނަމަވެސް، އެ ޕާޓީއަށް "އެ މަދުވާ އެތިކޮޅު، ފަސެންޓް" ނުލިބި ރާއްޖޭގައި އޮތް އެންމެ ބޮޑު އެންމެ މެންބަރުން ގިނަ ޕާޓީ މަގުމަތި ވާންވީތޯ ނުވަތަ ނޫންތޯ އެއީ އެންމެންވެސް ހިތާއި ހިތާއި ކުރަންޖެހޭ ސުވާލެއް ކަމަށް ރައީސް ޞާލިހު ވިދާޅުވިއެވެ.