މާލެ ސިޓީ ކައުންސިލުން މިސްކިތް ތައް މަރާމާތު ކުރުމަށް ކަމަށް ބުނެ ފައިސާ ހޯދުމަކީ ބަލައި ނުގަނެވޭ ކަމަށް، ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު އަދި އެމްއެންޕީގެ ރައީސް މުހައްމަދު ނާޒިމް ވިދާޅުވެއްޖެއެވެ. 

މާލޭގައި ހުރި މިސްކިތްތައް އަންނަ ރަމަޟާން މަހަށް މަރާމާތު ކުރުމަށް ފަންޑް ހޯދުމަށް ޓެލެތޯނެއް ސިޓީ ކައުންސިލުން ކުރިއަށް ގެންދިޔުމާއި ގުޅިގެން ނާޒިމް ކުރެއްވި ޓުވީޓެއްގައި އޭނާ ވަނީ މިސްކިތް ތައް ބަލަހައްޓަން ކަމަށް ބުނެ ސިޓީ ކައުންސިލުން ފައިސާ ހޯދުން ބަލައި ނުގަންނަވާ ކަމަށެވެ.  

"މުސްލިމު ދައުލަތެއްގައި، މިސްކިތްތައް މަރާމާތު ކުރަން ފައިސާ ނެތުމަކީ ބޮޑުވެގެންވާ ލަދެއްް. ފައިސާ އިސްރާފުނުކޮށް ބޭނުންތެރި ކަންކަމަށް ފައިސާ ހަރަދު ކުރަން ޖެހޭ." ނާޒިމް ކުރެއްވި އެވެ. 

Advertisement

ނާޒިމް މިފަދައިން ވިދާޅުވެފައިވާއިރު، މާލެ ސިޓީ ކައުންސިލުން މިވީ 18 މަސްތެރޭގައި ސިޓީ ކައުންސިލްގެ ބެލުމުގެ ދަށުގައި ހުރި މިސްކިތް ތައް ބެލެހެއްޓުމަށާއި މަރާމާތު ކުރުމަށް ކައުންސިލްގެ އާމްދަނީއިން 10 މިލިއަން ރުފިޔާ ޚަރަދު ކޮށްފައިވާ ކަމަށް މާލެ ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ވަނީ ވިދާޅުވެފަ އެވެ. 

އަދި ސަރުކާރުން މިސްކިތް ތަކުގެ ބެޖެޓަށް ދިނީ އެންމެ 1 މިލިއަން ކަން ފާހަގަކުރައްވައި މުއިއްޒު ވިދާޅުވީ، ފަންޑު ހޯދުމަށް ޓެލެތޯން ބާއްވަނީ ކުރިއަށް އޮތް ރޯދަމަހަށް ނިންމަންޖެހޭ ބައެއް އިތުރު ކަންކަން ހުރުމުން ކަމަށެވެ.