ގދ. ފިޔޯރީ ސްކޫލްގައި އަލިފާން ރޯވެ އަނދަމުންދާތީ އަލިފާން ނިއްވުމަށްއެ ރަށަށް ދިޔުމަށް އެމްޑީއެފުން ދަތުރު ފަށައިފިއެވެ.

އެމްއެންޑީއެފުން ބުނީ ފިޔޯރީގައި އަލިފާނުގެ ހާދިސާއެއް ހިނގައިގެން އުޅޭތީ އެއަތޮޅު ތިނަދޫގައި ހުންނަ ފަޔަ ސްޓޭޝަނުގެ ފަޔަމަނުން އެރަށަށް ދާން ތައްޔާރުވަމުން އަންނަ ކަމަށެވެ. ތިނަދޫން ފިޔޯރީއަށް ދާން 45 ވަރަކަށް މިނެޓް ހޭދަވާނެ ކަމަށް ވެސް އެމްއެންޑީއެފްގެ މީޑިއާ އޮފިޝަލް ވިދާޅުވި އެވެ.

މިކަމާއި ގުޅިގެން އެޑިއުކޭޝަން މިނިސްޓްރީން ބުނީ، މިއަދު ހަވީރު ގާތްގަނޑަކަށް 5 ގައި ފިޔޯރީ ސްކޫލުގެ ބައު ހޯލުގައި އަލިފާނުގެ ހާދިސާއެއް ހިނގާފައިވާކަމަށެވެ. 

Advertisement

މިހާދިސާ ހިނގާފައިވަނީ ސުކޫލު ބަންދު ވަގުތެއްގައި ކަމުގައި ވުމުން ހާދިސާ އާއި ގުޅިގެން އެއްވެސް ކުއްޖަކަށް އަދި މީހަކަށް ގެއްލުމެއް ނުވާކަމަށްވެސް މިނިސްޓްރީން ބުނެއެވެ. 

މީގެ އިތުރުން މިނިސްޓްރީން ބުނީ، އަލިފާން ރޯވި އިމާރާތުގައި 5 ކްލާސްރޫމް ހުންނައިރު އެތަނުން 3 ކްލާސްރޫމް ގައި ކުދިންނަށް ކިޔަވައިދޭ ކަމަށާ، އެކުދިންގެ ކިޔެވުން ހުއްޓާނުލައި ކުރިއަށް ގެންދިޔުމުގެ އިންތިޒާމް މިނިސްޓްރީއާއި އެ ސުކޫލާއި ގުޅިގެން ހަމަޖައްސަމުންދާ ކަމަށެވެ. 

އަދި އެމްއެންޑީއެފާއި ފުލުހުންގެ އެހީތެރިކަމާއެކު އަލިފާން ނިއްވުމާއި އަލިފާނުގެ ހާދިސާ ދިމާވި ސަބަބު ދެނެގަތުމަށް މަސައްކަތް ކުރަމުންދާކަމަށްވެސް މިނިސްޓްރީން ބުނެއެވެ.