ނީލަން ފިހާރަތައް ހުންނަ ސަރަޙައްދުގައި ބޮޑު އަލިފާނުގެ ޙާދިސާއެއް ހިނގާފައިވާއިރު، އެ ސަރަޙައްދަށް ނައިބްރައީސް ފައިސަލް ނަސީމް ޒިޔާރަތްކުރައްވައިފި އެވެ.
އެ ސަރަހައްދު ބައްލަވާލެއްވުމަށްފަހު ނޫސްވެރިންނަށް ދެއްވި ބަސްދީގަތުމެއްގައި ނައިބުރައީސް ފައިސަލް ވިދާޅުވީ ސަރުކާރުގެ ވިސްނުމަކީ އެފަދަ ތަންތަން މީހުން ނޫޅޭ ސަރަހައްދުތަކަށް ބަދަލުކުރުންކަމަށެވެ. އަދި އެ އަމާޒަށް ސަރުކާރުން މަސައްކަތް ކުރާނެކަމަށް ފައިސަލް ވިދާޅުވި އެވެ.
އަދި މި ޙާދިސާއާ ގުޅިގެންވެސް އަޅަންޖެހޭ ފިޔަވަޅުތައް ސަރުކާރުން އަޅާނެކަމަށްވެސް ނައިބުރައީސް ވަނީ ވިދާޅުވެފައެވެ.
ނީލަން ފިހާރައިގައި ހިނގި އަލިފާނުގެ ހާދިސާގެ މައުލޫމާތު ފަޔާ އެންޑް ރެސްކިޔުއަށް ލިބުނީ މިއަދު ހެނދުނު 5:43 ހާއިރުއެވެ.
މި ހާދިސާގައި އެއްވެސް މީހަކަށް އަނިޔާ ލިބިފައި ނުވިޔަސް، ނީލަން ފިހާރައިގެ އުތުރު ފަޅިން އިމާދުއްދިން ސްކޫލާ ދިމާއިން ފެތުރެމުންދިޔަ އަލިފާންގަނޑުގެ އަސަރު، މާލެ ސިޓީ ކައުންސިލުގެ ބިދޭސީ މުވައްޒަފުން ތިބި ތިން ބްލޮކަކަށް ވަނީ ކޮށްފައެވެ.
މި ހާދިސާއާއި ގުޅިގެން މާލޭ ސިޓީ ކައުންސިލްގެ 166 ބިދޭސީ މުވައްޒަފުން ވަނީ އިމާދުއްދީން ސުކޫލުގައި ގާއިމްކޮށްފައިވާ ވަގުތީ ބޯހިޔާވައްސަށް ބަދަލުކޮށްފައެވެ. އަދި އެ މުވައްޒަފުންނަށް ބޭނުންވާ ކަންކަން ފުރިހަމަކޮށްދިނުމުގެ މަސައްކަތް މާލޭ ސިޓީކައުންސިލުން ގެންދަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
