މިފަހުން މާލެ އާއި އަތޮޅުތަކުގައި ހިނގައިދިޔަ އަލިފާނުގެ ހާދިސާތަކާ ގުޅޭ ބޮޑު ތަހުގީގެއް ފުލުހުން ފަށައިފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.

ރޭ ފަތިހު ނީލަން ފިހާރައިގައި ރޯވެ، ބޭނުން ނުކުރެވޭ ވަރަށް އަނދާ ހުލިވެފައިވާއިރު، ސީޕީ މިއަދު ކުރެއްވި ޓްވީޓެއްގައި ވިދާޅުވީ، މި ފަހުން މާލެ އާއި އަތޮޅުތަކުގައި ހިނގާފައިވާ އަލިފާނުގެ ހާދިސާ ތަކާއި ގުޅޭ ބޮޑު ތަހުގީގެއް ފަށާފައިވާ ކަމަށެވެ. 

އަދި މި ތަހުގީގު ހިންގާނީ ހަމައެކަނި މާލޭގައި ނޫން ކަމަށާއި އަތޮޅުތަކުގެ ތެރޭގައި ހިނގައިދިޔަ އަލިފާނުގެ ހާދިސާތައް ވެސް މި ތަހުގީގުގެ ތެރޭގައި ހިމެނޭނެ ކަމަށް ސީޕީ ވިދާޅުވި އެވެ. ފުލުހުންގެ މި މަސައްކަތަށް އާންމުންގެ އެހީތެރިކަން ވަރަށް މުހިންމު ކަމަށް ވެސް ހަމީދު ވިދާޅުވި އެވެ.

ފަހަކަށް އައިސް މާލެ އާއި އަތޮޅުތެރޭގައި އަލިފާނުގެ ގިނަ ހާދިސާތަކެއް ހިނގާފައިވާއިރު މިދިޔަ އަހަރުގެ ނޮވެމްބަރު މަހު މާލޭގެ ނިރުފެހިގޭގައި ހިނގި އަލިފާނުގެ ހާދިސާ އާއި ޑިސެމްބަރު މަހު ތިލަމާލެ ބްރިޖް އެޅުމުގެ މަސައްކަތް ކުރާ އިންޑިއާގެ އެފްކޮންސް ކުންފުނީގެ މުވައްޒަފުން ގުޅީފަޅުގައި ތިބޭ ތަނުގައި ހިނގި އަލިފާނުގެ ހާދިސާ ފާހަގަކޮށްލެވެއެވެ.

އަދި މީގެ އިތުރުން އިއްޔެ ހަވީރު ގދ. ފިޔޯރީ ސްކޫލުގައިވެސް އަލިފާނުގެ ހާދިސާއެއް ހިނގާފައިވާއިރު، އަލިފުށީ ކުނިގޮނޑުގައި ހުރި ފައިބަރުތަކެއްގައި މިދިޔަ ހޮނިހިރު ދުވަހު އަލިފާން ރޯވުމުގެ ސަބަބުން ވެސް ބޮޑު އަލިފާނުގެ ހާދިސާއެއް ވަނީ ހިނގާފައެވެ.