މާލެ ސިޓީ ނީލަން ފިހާރައިގައި ރޯވީ، އެ ފިހާރަ އިންޑަސްޓްރިއަލް ޒޯނަށް ބަދަލުކުރަން އެދިފައި ވަނިކޮށް ކަމަށް މާލޭ މޭޔަރު ޑތ. މުހައްމަދު މުއިއްޒު ވިދާޅުވެއްޖެއެވެ.

ކުރީގެ އެއް ނަމްބަރު ކޮށި ސަރަހައްދުގައި ހިންގާ ނީލަން ފިހާރަ، ސިނާއީ ސަރަހައްދަށް ބަދަލުކުރުމަށް ސިޓީ ކައުންސިލުން ވަނީ ނިންމާފައެވެ. ނަމަވެސް އެ ކަން އެގޮތަށް ނުވެ އޮތީ ސަރުކާރުގެ އެއްބާރުލުމެއް ނުލިބުމުން ކަމަށް، ރޯވި ސަރަހައްދުގައި ހުރެ މީޑިޔާއަށް މައުލޫމާތު ދެއްވަމުން މުއިއްޒު ވިދާޅުވިއެވެ.

"މާލެ އަދި ކޮންމެ ސިޓީއެއްގައި ވެސް ސެކަންޑް ހޭންޑް މާކެޓެއް އޮންނާނެ. އެއީ އޮންނަ އެއްޗެއް. އެކަން ކުރެވެން ވާނެ. އެކަމަކު މީހުން ތޮއްޖެހިފައި އޮންނަ ތަނަކު ނޫން ކުރާނީ. ރައްޔިތުންނަށް ބޭނުންވާ މި ކަހަލަ ކަންކަމުގައި ސަރުކާރުގެ އެއްބާރުލުން މުހިންމު،" މުއިއްޒު ވިދާޅުވިއެވެ.

Advertisement

މުއިއްޒު ވިދާޅުވި ގޮތުގައި، މި ހާދިސާއާ ގުޅިގެން ސިޓީ ކައުންސިލްގެ 200 ބިދޭސީ މުވައްޒަފުން ވަންނާނެ ތަނެއް ނެތި ވަނީ މަގުމަތި ވެފައެވެ. 

"މަގުމަތީގެ މުނިސިޕަލް ބައެއް ހިދުމަތްތަކަށް މިއަދު ލޮޅުން އަރާނެތީ އެކަމާ އަޅުގަނޑު ކަންބޮޑުވޭ. އުންމީދު ކުރަން މީގެ ސަބަބުން މި ލިބޭ ހީނަރުކަން މިއަދަށް އަންޑަސްޓޭންޑް ވާނެ ކަމަށް،" މޭޔަރު ވިދާޅުވި އެވެ.