މާލޭ ސިޓީ ނީލަން ފިހާރައިގައި ހިނގި އަލިފާނުގެ ހާދިސާގައި މަގުމަތިވި މާލޭ ސިޓީ ކައުންސިލްގެ މުވައްޒަފުންނަށް ދާއިމީ އެކޮމަޑޭޝަން ދެމަހެއްހާ ދުވަސްތެރޭ ހަދާ ނިންމާނެ ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، ރޭ ނޫސްވެރިންނާ ބައްދަލުކޮށް ދެއްކެވި ވާހަކަފުޅުގައެވެ.
މި ހާދިސާއާ ގުޅިގެން މަގުމަތިވި މީހުންނަށް ވަގުތީ ހިޔާއަކަށް ހަމަޖެއްސީ ކޮވިޑް ފެސިލިޓީއެވެ. އަދި މާލެއަށް އައުމަށް ހަމަޖެއްސީ އެމްޓީސީސީ ބަހުގައި ދަތުރު ކުރުމަށެވެ.
"އަޅުގަނޑުމެންނަށް ބަސް ހަމަޖެހިފަ އެބައޮތް، އެމްޓީސީސީގެ ޑަބަލް ޑެކަރ ދެ ބަސް އެބަ އޮތް. އެހެންމަ ގެންގޮސް ގެނެސް ހެދުން އޭގަ ހަމަ ކުރިއަށް ގެންދެވޭނެ،" މުއިއްޒު ވިދާޅުވިއެވެ.
ނަމަވެސް މިއީ އެންމެ 'އައިޑިއަލް ސިޓުއޭޝަން' ނޫން ކަމަށް މުއިއްޒު ވިދާޅުވިއެވެ.
އެހެންކަމުން ދާއިމީ އެކޮމަޑޭޝަންއެއް ހެދުމަށް މާދަމާއިން ފެށިގެން މަސައްކަތް ފަށާނެ ކަަމަށާއި، ދެމަހެއްހާ ދުވަސް ތެރޭގައި ދާއިމީ އެކޮމަޑޭޝަން ހަދާނެ ކަމަށް މުއިއްޒު ވިދާޅުވިއެވެ.
"ބަލާނީ މަސް ދުވަހުގެ ތެރޭގަވިޔަސް، ސިޓީކައުންސިލް ގޯތިތެރޭގައި ވިޔަސް އަމިއްލަ ކޮންޓްރޯލްގައި މުވައްޒަފުުން ބެހެއްޓޭނެ ދާއިމީ ސެޓަޕެއް ހެދުން،" މުއިއްޒު ވިދާޅުވިއެވެ.
ނީލަން ފިހާރައިގައި، އިއްޔެ ހެނދުނު ރޯވި އަލިފާނުގެ ހާދިސާއާ ގުޅިގެން މާލެ ސިޓީ ކައުންސިލުގެ 166 ބިދޭސީ މުވައްޒަފުންނަށް ވަނީ ވަގުތީ ބޯހިޔާވަހިކަން ދިނުމަށް ކޮވިޑް ފެސިލިޓީއަށް ގެންގޮސްފައެވެ.
އަލިފާނުގެ ހާދިސާގެ ސަބަބުން ވަގުތީ ބޯހިޔާވަހިކަން ދޭން ޖެހުނު މުވައްޒަފުން ވަގުތީގޮތުން ކުރިން ތިބީ އިމާދުއްދީން ސްކޫލްގައެވެ.
މި ހާދިސާގައި އެއްވެސް މީހަކަށް އަނިޔާ ލިބިފައި ނުވިޔަސް، ނީލަން ފިހާރައިގެ އުތުރު ފަޅިން އިމާދުއްދިން ސްކޫލާ ދިމާއިން ފެތުރެމުންދިޔަ އަލިފާންގަނޑުގެ އަސަރު، މާލެ ސިޓީ ކައުންސިލުގެ ބިދޭސީ މުވައްޒަފުން ތިބި ތިން ބްލޮކަކަށް ވަނީ ކޮށްފައެވެ.
މާލޭ މޭޔަރު ވިދާޅުވި ގޮތުގައި، މީހަކަށް އަނިޔާ ނުވި ނަމަވެސް ހިފާގެންގުޅޭ އެއްޗެއްސާއި ޕާސްޕޯޓް އަދި ފައިސާވެސް ވަނީ އަނދައިގެން ގޮސްފައެވެ.
Advertisement
This content is created and paid for by advertisers and does not involve Voice Journalists
